Aammalu!

Small Time Giants studiami

Ukiut marlorpiaat matuma siornatigut kalaallit nipilersoqatigiit Small Time Giants saqqummersitaqqaartik saqqummersippaat, taannalu iTunes-imi sapaatip akunnera normu 1-iuvoq, Danmarkimi saqqummersitani digitaliusuni tunineqarnerpaatut

Small Time Giants nutaamik nuusiorput

Small Time Giants studiamut uteqqipput. Tamatumuuna nuussuarmik immiussissallutik 2014-ip ingerlanerani saqqummersussamik. Nuussuaq sananeqarpoq Søren Balsner-imit, nipilersoqatigiinnit Carpark North-imeersumit, taassuma Københavnimi studiaani.
– Søren Balsner Danmarkimi producerit kakkannerpaat ilaattut isigineqarpoq. 2012-imi Kalaallit Nunaat Tivoli-mi nipilersortugut takusimavaartigut, kingornalu isumaqatigiippugut nuusiaqqaarput sanassagaa. Pimoorussilluarpoq tamannalu peqatigalugu nipilersoriaaserput takutitseriaaserpullu malugisimalluarlugu, Miki Jensen, Small Time Giants-imi erinarsortartoq oqarpoq.
Small Time Giants oktobarimiilli studiamit sulinngiffeqarsimapput immiussinissaq sioqqullugu nipilersukkat tamakkiisumik samminiarlugit. Nipilersoqatigiit nipilersukkanut sapaatip akunneranut akunnerit 40-t atortarsimavaat, ilaanneeriarlutik sungiusarfimminni unnuisarlutik, minnerunngitsumillu tusarnaartitsinissamik neqeroorutit arlallit itigartittariaqartarsimallugit.
– Nipilersukkanik kalaallit nipilersoqatigiivinit immiunneqarsimasunit suliarilluagaanerpaanik sananiarpugut. Ulloq unnuarlu erinnanik taallanillu ulapittarsimavugut, imalu pitsaatigaat qularutiginagu ernuttariligassatta arlaanni sulerisimanersugut innersuussutigisalissagaat.
Nipilersoqatigiit nuutinik saqqummersitsisarfeqanngillat nuutillu suliarinerata annersaa nammineq aningaasalerlugu, taamaassimavorlu siulleq EP sanaavat nuannarineqarluarsimasoq ´Six Shades of Heart´.
– Nipilersoqatigiittut ataatsimooqatigiinneq pingaarteqaarput, aalajangiinerit tamarmik ataatsimut pisarlugit. Nuutinik saqqummersisitsisarfeqannginnatta oqiliallannartumik kiffaanngissuseqarpugut piumassuseqarlutalu, nammineq imminut oqartussaaffigigatta. Nuannarineqarluinnartussamik sananissatsinnut tatineqanngilagut. Upperisavut suliariinnarpavut, Miki Jensen oqarpoq.
Nipilersoqatigiit nipilersukkanik malinnaasut sapinngisaminnik attaveqarfiginiarpaat. Immiussinerat malinnaaffigineqarsinnaavoq uani smalltimegiants.com, tassani sapaatip akunnikkaartumik immiussinermit ullorsiummut allattoqartassalluni.

Powered by Labrador CMS