crowdfunding

Small Time Giants saqqummersitseqqaangajalerput - kisiannili

Small Time Giants cd-mut saqqummerseqqaagassaminnut crowdfunding-imik suliniutsik angungajalerpaat Alaskamit Japanimillu inunnit tapersersorneqarlutik. Pisariaqarporli katersorniakkat tamaviisa pissarsiarinissaat

Mike Jensen Small Time Giants-imilu nipilersortartoqatai nuummik saqqummersitsingajalerput

Small Time Giants saqqummerseqqaarniakkaminnut ´Stethoscope´-mut, erinarsukkanik nutaanik 11-nik imalimmut, qaammatini pingasuni crowdfundig aqqutigalugu aningaasanik katersuiniarsimapput. Manna tikillugu 94 procentit katersorneqarsimapput, sinnerilu sapaatip akunnerata ataatsip iluani katersorneqassapput.
Qaammatini marlussunni kingullerni Small Time Giants tapersersorneqarsinnaasimapput saqqummersitassaat siumut inniminnerlugu imaluunniit misigisassanik arlalinnik pisinikkut. Ilaatigut saqqummersitassaat formatinut assigiinngitsunut siumut inniminnerneqarsinnaavoq, taalliat assammik allatat pisiaralugit, Skype-mi tusarnaartitsinissamik inniminniilluji imaluunniit nipilersoqatigiit sungiusartarfianni nammineq tusarnaartinneqarluni. Aningaasat katersat atorneqassapput saqqummersinniagaasa saqqummersinneqarnissaanut, anguniakkallu anguneqarpata taanna septembarimi saqqummersinneqassaaq.

100 procenti anguneqassaaq
– Crowdfunding imatut ingerlasarpoq ikiorsiisut tamarmik aningaasat tunniussatik utertissallugit, aningaasat tamakkivillugit katersorneqarsimanngippata. Uagutsinnik saqqummersitassatsinnillu tapersersuineq tatiginninnerlu qujamasuutigisorujussuuvarput. Inunnik allaat Alaskameersunik Japanimeersunillu suliniut tapersersorneqarpoq, Small Time Giants tusagassiorfinnut nalunaarutikkut allapput.
– Inuinnaat katillugit 127-t katillugit 49.820 koruuninik tapiissuteqarsimapput, taakkulu naammangajapput nuusiatta saqqummersinneranut siammarsarneranullu aningaasartuutissanut. Pisariaqarporli katersorniakkat tamakkivillugit katersornissaat. Taamaattumik pissangasorujussuuvugut sapaatip akunnerata ingerlanerani anguniagaq angussanerlutigu, nipilersoqatigiit allapput.

Crowdfunding atugaaleriartorpoq
Crowdfunding Kalaallit Nunaanni suli nutaajusorujussuuvoq, taamaattumik Small Time Giants-ip neriuutigaa nipilersortartut amerliartuinnartut crowdfunding-imi periarfissat paasiartulissagaat.
– Nipilersortartut siunissaminnut nuutinik saqqummersitsisarfinnik isumalluuteqartarnerat qaangerneqangajalerpoq. Internettimit qitornaavugut, tassuuna nunarsuarmi tamarmi inuppassuit eqqumiitsuliortut suliniutillit toqqaannartumik aningaasanik tapiiffigisarlugit, allaammi suliniutinut aallartisarneqaannalersunulluunniit. Tunngaviatigut inuinnaapput pissutsit ingerlannissaannut imminnut ikioqatigiittut, pisarnertut saqqummersitsisarfiit, niuertarfinnik isumaqatigiissuteqarnerit aningaaserivimmilu taarsigassarsinerit aqqutiginagit, Small Time Giants nassuiaapput.
Suliniut iluatsissappat Small Time Giants nuusiartik oktobarimi saqqummersissavaat.

Powered by Labrador CMS