Small Time Giants normu 1-iusut

Nipilersoqatigiit rockertartut Kujataaneersut, Small Time Giants, juullisiut "Angerlarlanga" saqqummersippaat. Danmarkimi iTunesimi erinarsuutini ullumikkut downloaderneqarnerpaavoq, taamaattumillu nipilersukkani downloaderneqarnerpaatut nuannarineqarnerpaat allattorsimaffiani normu 1-iuvoq.

Nipilersoqatigiit nuutiliami normu 1-itut inissisimareernikuupput, kisianni aatsaat kalaallit nipilersoqatigiit singlemik saqqummersitat nuannarineqarnerpaat allattorsimaffianni siuttuupput.

- Erinarsuutip taama nuannarineqartiginera tuppallernaqaaq, Small Time Giantsikkunni bassertoq, Jakob Skovaa oqarpoq.

- Nuannaralugu allattut amerlapput, nunannarineqarnerpaallu allattorsimaffianni qummut ingerlasoq paaseriasaarparput. Top 100-miinnissaaluunniit ilisimaginngikkaluarparput.

'Last Chrismas' nipilersorumasimanngikkaat
Nunatsinnut juullimut inuulluaqqusinermi immiussinermut atatillugu erinarsuut pilersinneqarpoq. Danmarkip Radioata nipilersoqatigiit 'Last Christmas' issuarlugu atorusunneraat aperai. Small Time Giantsikkulli tamanna itigartitsissutigaat, namminerlu juullisiummik erinniorlutik taalliorput.

- Danmarkimi ukiuni kingullerni juullisiortarpugut, taamaammat nipaannermut, taarnermut aputillu nipaanut maqaasinerput pillugu erinarsuusiorusuppugut, Jakob Skovaa oqarpoq.

- Kalaallisut ilaatigut oqaasertalimmik siullerpaamik immiussivugut, Kalaallit Nunaat angerlarsimaffigalugu taamaalilluta takutikkusullugu.