sammisaq: Nunatsinni nipilersorneq
Small Time Giants-ikkut streamingimi nipilersukkat isumalluarfigaat
Nipilersortartutut Spotify-mi Apple Musicimilu streamingimik kiffartuussiviit imatorsuaq aningaasarsiorfiunngillat, postrockimik nipilersortartut Small Time Gintsikkut erinarsortartuat oqaluttuarpoq
Small Time Giantsikkunni erinarsortartoq Miki Jensen nipilersukkanik tusarnaartarnini pillugu imminut qanganisarsiulaartutut taavoq. CD-lli nuussuillu tusarnaarneq ajorpai, tusarnaartarpaa Spotify, taannalu nipilersukkanik streamingimik kiffartuussinermi siuttuunersaavoq.
– Tassani festernermut aliannaarnissamullu nipilersukkat nassaarisarpakka, Miki Jensen Sermitsiaq.AG-mit apersorneqarluni oqarpoq.
Nipilersoqatigiit isumassarsiortuussapput
Ajoraluartumilli Spotify-mit nittarsaavinnillu allanit toqqaannartumik aningaasarsiortoqarsinnaanngilaq, taanna oqarpoq.
– Piffimmi digitalikkut streamingeqarfiusumi, anngiortumik nuutitsisinnaaffimmi digitalinilu tuniniaaffiusumi eqqumiitsuliortut iluanaaruteqassagunik isumassarsiullaqqissuusariaqarput. Nuutinik tunisisarneq qangatut ikkunnaarsimavoq, Danmarkimilu nipilersortartut tusaamasaanerit taamaallaat tusarnaartitsinerinnangajavinnik, merchandise-nik tuniniaanermik, sponsoriliissutinit ussassaarinermillu ingerlatsivinnik isumaqatigiissutinik aningaasarsiuteqarput, nipilersoqatigiit erinarsortartuat, ukiuni arlalinni Danmarkimi najugaqarsimasoq, nassuiaavoq.
Nipilersoqatigiittut nassaarniallaqqissuussariaqarpoq saqqummersitavit naalaarneqartarnerannit aningaasarsiussaguit. Periuserlu nutaaq taanna kalaallit niplersoqatigiit marlussuinnaat atorsinnaa vaat.
Kalaallit Nunaanni suli iluamik pitsanngorsaasoqarsimanngilaq, Small Time Giantsikkut erinarsortartuat naliliivoq.
Immiussat isertitakiffiusut
– Nunani tamalaani nuutinik tuniniaaviit streamingimut sungiussiuminaatsitsinerat assigalugu kalaallit nipilersortartut aamma qularnanngitsumik eqqarsarnartoqartitsipput. Sooq nipilersukkat akeqanngiusartumik tunniunneqassappat - siusinnerusukkut nipilersukkanik naalaartartut nuutinik ilivitsunik pisisarsimagaluit? Nipilersortartut ullumikkut Spotify-mi immiussamut ataatsimut 3,2 øret missaannik pissarsisarput, Kalaallillu Nunaanni CD-mik ataatsimik tunisinermi 75-80 koruunit akornanni pissarsisarlutik.
Nipilersoqatigiit streamingikkut annikitsuinnarmik aningaasarsiorsinnaapput nipilersukkanik tusarnaartut ikittuinnaappata. Tamatumuunakkullu nipilersortartut sakkortuumik eqqorneqartarput, suliaminnut aningaasartuutitik taama amerlatigisartillugit.
– Allaammi nunatsinni nuusiorneq tusintinik untritilinnik marlussunnik akeqarsinnaavoq. Tassa streamingimi aningaasatigut pissarsissutigissagaanni millioninit marlussunnik amerlassusilinnit isiginnaarneqartariaqarpoq, Miki Jensen oqarpoq.
Streamingilli nuannaarutigai
Assersuutigalugu Spotify-mit imaluunniit Apple Musicimit aningaasat pissarsiassat ikikkaluartut nipilersukkanik streamingikkut siammarsaasarneq nipilersoqatigiinnut iluaqutaasimavoq.
– Streamingimik kiffartuussiviit naalaartartunut nutaanut ammaapput. Small Time Giantsimi nunarsuarmit tamangajammit nersualaarissutinik mail-erfigineqartarpugut, nipilersukkatsinnik nuannarinnilersimasunit. Saqqummersitavut tusarnaarsimanavianngikkaluarpaat streamingimik kiffartuussivissuarni akeqanngitsumik pissarsiarineqarsinnaasimanngitsuugaluarpata.
Akuersaarpaa
– Inuit tamakkua naggataatigut CD-mik, tuluujuaqqamik imaluunniit plakatimik pisisarput nipilersortartut tapersersorniarlugit. Aalajangersimavugut streaming pitsaasutut isiginiarlugu - taannalu nipilersukkanik nutaanik nassaarniarnittsinni uagut nammineq atortarparput, Miki Jensen oqarpoq.
´Kalaallit Nunaanni nipilersorneq´qaammammi uani Sermitsiaq.AG-p sammivaa. Septembarimi sammivagut nipilersortartut inuunerat atugassarisaalluy. Aamma sinerissami nipilersortartunik suli ilisimaneqalinngitsunik tusagaqarusuppugut.