Small Time Giants-ikkut angerlarsimaffinni nipilersornissamut periarfissiisut

- Nipilersoqatigiittarnerput Qaqortumi aallartippoq, sungiusartarfinniillu atortakkagut avammut tusaatikkusussimallugit anguniagaqarluta. Nipilersortarnerput pissutigalugu nooqattaarnikuuvugut, immitsinnut ataatsimoornerulerluta, inuunerullu sinneranut eqqaamasassatsinnik misigisaqarfiginikuullugu. Nammineerluta anguniakkatsinnik anguniagaqartuaannarnikuuvugut periarfissanillu nutaanik ujartuisarluta. Tusarnaartartugut nipilersornitsinnullu malinnaasartut cd-liornissatsinnut ikioqataasinnaapput.

Small Time Giants-imi guitarertoq Pilutannguaq Hammeken oqarpoq.

Nipilersoqatigiit nuannarineqarluartut tapersersorneqarluarnissartik kissaatigaat. Cd-liartik siulleq 'Stethoscope' maannakkut immiutileruttorpaat taannalu aqqanilinnik nutaanik taallaqassasoq oqaatigaat.

Puisip amia
- Immiussinitsinni atukkagut tamaasa nammineerluta aningaasartuuteqarfigaagut, maannamullu 38.000 koruuninik cd-ip saqqummernissaanut amigaateqarluta suli. Nittartagaq Pledgemusic aqqutigalugu siumoortumik saqqummersitassarput aaneqarsinnaavoq download-erneqarsinnaalluniluunniit. Aamma cd nipilersortunik atsiornilik puisip amianik puulik pisiarineqarsinnaavoq. Assigiinngitsunik misigisaqartoqarsinnaavoq, angerlarsimaffinnut Skype-luunniit atorlugu tusarnaartitsisinnaagatta, Pilutannguaq Hammeken oqarpoq.

Cd-liaq septembarimi naammassineqassaguni aningaasanik katersineq juulip qeqqani naammassereersimassaaq.

- Anguaniakkatta 24 procentia sapaatip akunneri marluk ingerlanerini angoreerparput. Neriuutigeqaarput una iluatsissinnaassallugu, tassami nuannaartorinnittugut aqqutigalugit una cd-liarput suliarineqarmat, Small Time Giants-imit nalunaarput.

Aningaasanik katersinerminni video-liaat qulaani takuneqarsinnaavoq

Small Time Giants-ikkut nittartagaanni aamma qanoq tapiisoqarsinnaanersoq takuneqarsinnaavoq