namminiilivinneq
Skotsit namminersulivinniarnerat Partii Inuinit tapersersorneqarpoq
Skotlandimi innuttaasut taasissutigissavaat Tuluit Nunaannit namminersulivinniarnerlutik. Tamanna malunnartinneqassaaq. Partii Inuit Nuummi Qeqertarsuarmilu kaffillissaaq
Partii Inuit Nuummi allaffeqarfimminni kaffillissapput sisamanngornermi nalunaaqutaq ataatsimit tallimat tungaanut. Skotlandimi innuttaasut Tuluit Nunaannut namminersulivinnissamik taasineranni malunnartitsissapput. Randi Broberg Qeqertarsuarmi aamma kaffillissaaq, Siorarsuit illu B 530-mi kaffillertoqassalluni.
Partii Inuit, Danmarkimit aamma aniguerusuttup, Skotlandip namminersulivinnissaa neriuutigaa.
Skotland Kalaallit Nunaallu assigiittut
- Skotsit uagutsitulli atugaqarput. Danskit politikkerii, Dansk Folkepartiunerusut, isumaqarput namminersulersinnaanngitsugut, ajornartorsiuteqarpallaartugut namminerlu nunarput aqussinnaanngikkipput. Nammineersinnaavugut aamma namminersulerusuppugut, Partii Inuit siulittaasuat Nikku Olsen Sermitsiaq.AGmut oqarpoq.
- Skotlandi namminiilivissagaluarpat nunarsuatsinni allannguisoqarujusuarsinnaavoq. Nunasiaataasimasut namminiilivinniarnerannik aqqutissiuusseqataasinnaapput. Nunasiaataasimasummi amerlasuut namminiilivinnissamik oqariartuuteqartut ukiuni kingullerni amerlapput. Kaffillissaagut Skotlandip namminiilivinnissaa tapersersoratsigu, Nikku Olsen oqarpoq.
Nunat namminersulertuuppata suleqatigiinnerat nukittunerulersinnaagaluarpoq.
- Aalisarnikkut suleqatigiinnerput nukittunerulersinnaavoq, tamanna aningaasaqarnikkut sunniisussaavoq. Skotlandi siunissami suleqatigilluarneqarsinnaavoq, imartaqatigaavummi, Nikku Olsen oqarpoq.