namminiilivinneq
Skotlandip namminersulivissanersoq ullumi taasissutigineqassaaq
Skotlandip siunissaanut pingaarutilimmik ullumi aalajangerneqassaaq. Qinersisartut amerlasuut taasiartornissaat naatsorsuutigineqarpoq
Skotlandimi taasiviit nalunaaqutaq 07.00 ammarput (nunatsinni nalunaaqutaq 04.00-nngortoq). Skotlandimi innuttaasut aalajangissavaat nunartik namminiilivissanersoq.
Taasisartut amerlassasut naatsorsuutigineqarpoq.
Misissuinerit kingulliit takutippaat Skotlandip innuttaasuisa amerlanerussuteqalaartortai Tuluit Nunaannut ataannarusuttut. Kisianni tamanna nikeratarsinnaavoq.
Namminiilvinniartut tennisertartumit Andy Murrayimit illersorneqarput, taanna Wembledonimi ajugaanikuuvoq.
- Skotlandimut ulloq pingaaruteqarpoq. Naaggaartut oqariartornerat isumaqaginagu namminersulivikkusuttunut ilannguppunga. Taasisoqarnissaa pissanganartorujussuuvoq. Namminersulinnissaq anguniarniartigu, Andy Murray oqarpoq.
Tuluit Nunaanni ministeriuneq David Cameronip Skotlandimi taasisoqarnissaanut sapaatit akunneri marluinnanngortullu tikeraarpoq, neriuutigaalu innuttaasut Tuluit Nunaanni 'angerlarsimaannarusussasut'. Aamma oqaatigaa Skotlandi namminersulivissappat nunamut aningaasaqarnikkut annertuumik kinguneqarumaartoq.
Cameronimut aamma Skotlandip aalajangiineranut kinguneqarsinnaavoq. Imaassinnaasormi ministeriunertut tunuartariaqalersoq Skotlandi namminersulivissappat.
Skotlandimi innuttaasut maannakkut aalajangertussanngorpaat nunartik siunissami sumut ingerlassanersoq.
Taasititsinermi inernerit tallimanngornerup ullaarngani paasinarsiumaartoq naatsorsuutigineqarpoq.