namminiilivinneq

Skotland namminiilivinnissamut naaggaarpoq

Tuluit Nunaannit namminiilivinnissamut taasititsinermi taasisut 54 procentii naaggaarput, 46 procentii angertut

Namminiilivinnissamut naaggaartut nuannattut

Skotlandi Tuluit Nunaannit namminiilivinnissamut innuttaasut taasitinneqarput sisamanngormat. Skotland Tuluit Nunaallu ukiut 300-t qaangerlugit ataqatigiipput.

Tuluit Nunaata ministeriunera David Cameronip oqaatigaa taasineq ersarissumik inerneqartoq.

- Taasinerup inernera erseqqippoq. Skotsit namminiilivissanngillat. Kinguaariinni matumani tamanna aalajangerneqarpoq, Tuluit Nunaata ministeriunera David Cameron taasinerup inernera tusarliunneqareersoq oqarpoq. Skotlandip siunissami annertunerusumik akisussaaffeqalernissaa neriorsuutigaa.

Taasititsisoqangajalernerani Cameron oqarpoq, naaggaartoqaraluarpalluunniit Skotland nunaminut annertunerusumik akisussaaffeqalissasoq.

Skotlandip ministeriata Alex Salmondip oqaatigaa Det Skotske Nationalparti ajorsartoq.

- Innuttaasut taasinerat ataqqivara, Salmond oqarpoq. Taasititsinermi innuttaasut taasisinnaasut 80 procentii angullugit taasiartortoqarnera Skotlandimi kikkut tamat oqartussaaqataanerat pitsaasuusoq oqaatigaa.

Naatsorsuutigaali Londonimi naalakkersuisut neriorsuutitik eqquutsissagaat. Siunissami namminersulivinnissamut apeqqut taasissutigineqaqqinnissaa aamma ammaffigaa.

Taasititsinerup naligiiffiungaatsiarnissaa naatsorsuutigineqarsimagaluarpoq, namminiilivinnissamulli naaggaartut amerlanerussuteqarluarput taasititsinerup naammassinerani.

Taasititsingajattoqalernerani Cameronip Skotlandimiinnermini oqarpoq Tuluit ataatsimoortariaqartut, aningaasat aamma eqqartorpallaanngilai.

Siunissami apeqqutit akineqarsinnaanngitsut nalornissutaaneri pillugit naaggaartoqartoq ilisimatuunit oqaatigineqarpoq.

- If you don't know, vote No, ilaatigut taama oqariartortoqarpoq. Tassa 'Aalajangiusimanngikkuit naaggaarit'.

Skotlandimi namminiilivinnissamik taasisoqarnera Europamit annertuumik malinnaaffigineqarpoq. Soorlu Cataloniami Spaniami immikkoortortaqarfimmiittup namminiilivinnissamik siunnertaqartut aamma assinganik taasititsissamaassanera pissangassutigineqarpoq.

Powered by Labrador CMS