Skejby Sygehus-imut Prins Henrik nuutinneqarpoq

Prins Henrik tallimanngormat nissumigut aseruuttoorneranut atatillugu nakorsarneqarnissaa pillugu Skejby Sygehus-imut nuutinneqarpoq.

Kunngikkormiut tusagassiutinut nalunaaruteqarnermikkut taama allapput.

- Prins-i maannamuugallartoq napparsimavimmiikkallassaaq. Tamatumalu kingunerisaanik Gråsten Slot-ilianngiinnassaaq naak pilersaarutaasimagaluartoq tamanna, kunngikkormiut allapput.

Sisamanngormat kunngikkormiut nalunaaruteqarput prins-i 83-inik ukiulik Universitetshospital-imi Aarhus-imiittumi unitsinneqarsimasoq nakorsarneqarlunilu.

Ilanngullugu nalunaarutigineqarlunittaaq prins-i kingusinnerpaamik arfinngornermi napparsimavimmit angerlartinneqarumaartoq.

Aqagumut unitsitaasussanngortoq – pingasunngornermi – kunngikkormiunit attaveqarnermut pisortaasoq Lene Balleby sapaatit akunneranut saqqummersartumut ”Her & Nu”-mut uppernarsiivoq prins-i peqqinnissaqarfimmi sulisunit takusarneqarsimasoq.

- Uppernarsarsinnaavarput piffissami qanittumi kunngikkormiusut ataqqinassusilik prins Henrik-imik ikiuisussamik sulisussamik peqqinnissaqarfimmi sulisumik atorfinititsigatta. Tunngaviusut malillugit suliassaqarfiit aalajangersimasut iluini suliassat ataasiakkaat pillugit oqaaseqarfiginninneq ajorpugut, Lene Balleby oqarpoq.

Prins Henrik-iup napparsimavimmut unitsinneqarnera peqqutigalugu ulluni tullerni pisortatigoortuni pisussani peqataanissaa taamaatinneqarpoq.

Arfininngormat kunngikkormiut ilaqutariit illorsuaminnut Gråsten Slot Sønderjylland-imiittumut nuupput. Kunngikkormiut umiarsuaanik ”Danneborg”-imut ilaalluni dronning-i arfininngormat ullaap tungaa qulinut Aabenraa-mut tikippoq.

Sapaammi dronning-i kunngissarlu Frederik kunngissallu nulia Mary Gråsten Ringriderforening-imi ingerlaaqatigiittut tikilluaqqussavaat.