skakfestivaali
Skakkertoqarnerani angut tappiitsoq maluginiarneqarluarpoq
Ittoqqortoormiini ukiormanna poorskikkunni skakkertoqarnerani skakkertartoq pikkorissoq Paulus Napatoq tappiitsoq maluginiarneqarluarpoq
Amerlasuut isigisinnaagaluarlutik skakkerneq ajornakusoortissinnaasarunarpaat. Taava takorlooriaruk sikornerlutik skakkernissat qanoq issanersoq.
Paulus Napatoq tappiitsoq skakkertarpoq. Tappiitsuunerali skakkertartumut aporfiunngilaq, ukiormanna Ittoqqortoormiini poorskimi skakkertitsisoqarnerani taanna maluginiarneqarluarpoq, pisarneq malillugu Islandimiut skakklubbiat Hrókurinn aaqqissuisuuvoq.
Atuaruk: Illoqqortoormiuni ukiut aqqanilissaanni poorskikkunni skakkertitsisoqassaaq
Paulus Napatoqip skakkerluni unammiuaarnermi tallimanngornermi tannaartumi arfinileriarluni unamminermini tamaasa ajugaaffigai, taamaalillunilu katinnerini ajugaasuuvoq.
Inussiarnersaarneq
- Unammiuaarneq nuannerluinnarpoq. Paulus Napatoq innarluuteqaraluarluni pikkorissorsuuvoq, Ittoqqortoormiinilu meeqqat Kalaallit Nunaanni skakkernermut pitsaanerpaapput. Inussiarnersaarnerujussuaraasit qujamasuutigeqqipparput, Hrafn Jökulsson, Islandimiut skakklubbianni Hrókurinnimi siulittaasoq oqarpoq.
Islandimi skakmesteri tikeraartoq
Skakkerluni unammiuaarneq sisamanngorneq illernartumi aallartippoq, tassani Ittoqqortoormiini skakkertartut Islandimi skakmesteri Rober Lagerman unamminissaanut periarfissaqarput. Taanna arlaleriarluni unammillerneqarluarpoq, unammisullu pingasut ajugaasoqanngitsoortillugu unammisimavaat.
Atuaruk: Skakernermik nuannarisallit naapeqatigeeqqittut
Poorsip aappaani skakkerluni unammiuaarneq naammassineqarpoq, ukiumoortumillu pingaarnertut naggaserneqarpoq ''Kalaallit Nunaata aamma Islandip ikinngutigiinnerat''.
Uteqqingajalersut
Islandimiut skakklubbiat Kalaallit Nunaannut tikeraaqqingajalerpoq.
- Maanna maajimi ukiumoortumik Nuummut angalanerput pissaaq, ikinngutitta naapinnissaanut qilanaaqaagut. Aamma Kangerlussualiassaagut, tassani 2016-imi skakklubbimik pilersitseqataavugut, Hrafn Jökulsson oqarpoq.
- Ungasissoq eqqarsaatigalugu Kalaallit Nunaanni illoqarfiit nunaqarfiillu tamaasa tikeraarnissaat anguniagaraarput, skakkertartut siulittaasuat oqarpoq.