Monday, July 17, 2017 - 10:42

Siunnersuutit 22-t: Qimussertarnermut kulturi ima annaanneqassaaq

Qimussillammassuaq Ville Siegstad Ilulissaneersoq
Assi.: Carsten Egevang / Eli Olsen
Qimussertartut ikiliartuinnarmata aamma qimmit qimuttut ikiliartuinnarmata, qimussertarnermut kulturi annaaneqarsinnaavoq. Taamatut ernumanartumik ineriartortoqarneranut Arctic Nomadsip siunnersuutaasa 22-iusut allanngortissavaat.

Siorna novembarimi nunanit tamalaaneersut qimussernermut kulturi pillugu Canadamiit, Ruslandimiit, USA-miit aamma Nunatsinniit peqataaffigineqartumik Sisimiuni ataatsimiittoqarpoq.

Qimussertarnermut kulturi pitsaanerpaamik qanoq attatiinnarneqarsinnaanersoq ineriartortinneqassanersorlu arlalinni siunnersuusiorput, tamannalu Sisimiut Katersugaasivianni sismanngornermi juulip 20-anni saqqummiunneqassaaq.

Kulturi nalitooq
Issittumi innuttaasut ilisarnaataasa kulturip nalituup attatiinnarnissaanut qanoq iliortoqartariaqarnersoq, quppersagaaqqap siunnersuutillu 22-t aalajangiisartunut erseqqarinnerulersinnissaat siunertarineqarpoq.

Siunnersuutit immikkoortunut sisamanut agguarneqarput: nunat tamalaat, nunagisat, najukkani aamma allani.

Nunanut tamalaanut tunngatillugu siunnersuutigineqarpoq, ''qimmigut qimuttut tamaasa akiuussutissamik kapitittassavagut, qimminullu qimuttuunngitsunik akuussanngilagut''.

Nammineq nunagisanut tunngatillugu siunnersuutigineqarpoq: ''Qimusserluni takornarissanik angallassisinnaanermut allagartartaarnissamut atugassarititaasut pitsaanerusut pilersissavagut, qimmussertartullu takornarissanik angallassinerannut akissarsiaqarnerulersissavagut''.

Assit takukkit: Qamusiortartut nunanit tamalaaneersut Sisimiuni naapipput

Nammineq najugarisami ilaatigut siunnersuutaavoq: ''Meeqqanut qimminik qimuttunik paarsisarnermut aasaanerani ilinniartitsinernik ingerlatsisassaagut''.

Nakkutilliisut
Immikkoortumi allanut tunngasuni arfinilinnik immikkoortortaqartumi ilaatigut oqaatigineqarpoq: ''Nakkutilliisunik qimminik qimuttunik suliaqartunik pilersitsissaagut, taakku nunat killingi akimorlugit praktikkeqatigiissiinnaassapput''.

Seneste nyheder / Nutaarsiassat kingulliit