inuussutissanik nakkutilliineq
Siunnersuut tunngavilersuutitaqanngitsumik unitsinneqartoq
Aalisarnermut Piniarnermullu Naalakkersuisoq Karl Kristian Kruse inuussutissanik nakkutilliinermik siunnersuutip sooq taamaatiinnarneqarnerata tunngavilersornissaanut piffissaqanngilaq
Sermitsiaq.AG-mi sapaatip-akunnerani siusinnerusukkut allaaserineqartutut Naalakkersuisut inuussutissanik nakkutilliinerup allanngortinneqarnissaanut siunnersuut taamaatiinnarpaat.
Siunnersuummi pineqarpoq inuussutissanik nakkutilliinermik allanngortitsinissaq, inuussutissanik nakkutilliisut alakkaajartortillugit toqoraaviit nersutinut toqorarneqartunut ataatsimut 10-15 koruuninik akiliuteqartalernissaannik ilaatigut imaqartussaq.
Atuaruk: Neqinut siunnersuut akerleriiffiusoq tunuartippaat
Piffissaqanngilaq
Siunnersuutip aallaqqaammut nassuiaatitaqanngitsumik marlunngornermi ullormut oqaluuserisassanit peerneqarsimanerata kingorna Sermimtsiaq.AG paasissutissanik Aalisarnermut, Piniarnermut Nunalerinermullu Naalakkersuisoqarfimmit marlunngornermi pissarsiniaraluarpoq, iluatsinngitsumilli.
Aaqqissuisoqarfiup tamatuma kingorna - kingullermik tallimanngornermi - naalakkersuisoq akisussaasoq, Karl Kristian Kruse (S) sooq nammineq siunnersuutiminik taamaatitsiinnarsimanersoq aperiniartarsimagaluarpaa.
Naalakkersuisulli allattaa mailikkut allappoq, naalakkersuisoq apeqqutip akinissaanut piffissaqanngitsoq ulapippallaarnini pissutigalugu. Naalakkersuisoq tamatuma kingorna tusagassiuutitigut nalunaarummut pingasunngornermi nassiussuunneqartumut tunngavilersuutinik imaqanngitsumut innersuussivoq.
Taamaalilluni siunnersuut sooq taamaatiinnarneqarnersoq suli paasinarsinngilaq.
Atuaruk: Grønlandsk mad bliver også dyrere