Inatsisartut
Siunnersuut: Nunatsinni kinaassutsimut uppernarsaammik pilersitsisoqarli
Inatsisartuni ilaasortaq Michael Rosing (D) nunatsinni kinaassutsimut uppernarsaammik pilersitsisoqarnissaanik siunnersuuteqarpoq. Tamanna innuttaasunut aammalu oqartussanut iluaqutaassaaq, taanna siunnersuummini allappoq.
- Qarasaasiami nassatassamillu nunatsinni kinaassutsimut ilisarnaammik peqalernissamut atatillugu inatsisiliornerup piaartumik aallartinneqarnissaa pillugu Naalakkersuisut peqquneqarput.
Michael Rosing (D) nunatsinni kinaassutsimut ilisarnaammik peqalernissamut Inatsisartunut siunnersuummini allappoq.
- Siunnersuut tassaavoq, innuttaasut tamarmik kinaassutsitut uppernarsaammik peqalernissaat, taannalu sumi najugaqarnermut uppernarsaatitut, napparsimalersinnaanermut sillimmasigaanermut allagartatut aammalu imigassarsiniarnermi sikaritsisiniarnermiluunniit uppernarsaatitut atorneqartartussaq. Taanna kinaassutsimut takussutissatut atorneqarsinnaassaaq, Michael Rosing Sermitsiaq.AG-mut oqarpoq.
Korti assitalik
Taanna ilassuteqarpoq, kinaassutsimut uppernarsaat aamma Danmarkimi atorneqarsinnaassasoq.
- Korti assitassaqassaaq, taannalu Danmarkimi aamma atorsinnaassalluni. Korti atorneqarfissaminut tulluarsagaassaaq paasissutissallu databasemut katersorneqarlutik, imaanngitsoq saaffiginninnerit tamarluinnaasa oqartussat paasissutissanik misissueqqaartassasut. Tamanna innuttaasunut aammalu oqartussanut pisariillisaataassaaq, Michael Rosing oqarpoq.
Akeqassanngitsoq
Ukioq kingulleq Inatsarisartut upernaakkut ataatsimiinneranni taanna siunnersuusiorsimavoq, taamani Naalakkersuisut siunnersuut tigulluarpaat.
- Naalakkersuisut naliliipput, innuttaasut pisortanik attaveqarnerat nunagisamik uppernarsaat atorlugu pisariinnerulersinneqarsinnaasoq. Tamanna innuttaasut pisortanut kinaassutsiminnik uppernarsaasinnaanissaminnut ullumikkut assigiissumik periuseqartoqannginneranut atatillugu isigineqassaaq. Aammattaaq inassutigineqarpoq nunagisamik uppernarsaatip taassuma najugaqarnermut uppernarsaatip, ullumikkut assigiinngitsunut atatillugu piumasarineqartartup, pisariaqartinneqarnera taamaatitikkiartuaassagaa, Naalakkersuisut ilaatigut oqarpoq.
Nalunaajaammi ilaatigut erserpoq nunatsinni kinaassutsimut ilisarnaammik pissarsiniarneq akeqarnissaa eqqarsaatersuutigineqarssinnaasoq.
Demokraatit taama isummernermut isumaqataanngillat. Ilisarnaat innuttaasuut akeqartariaqanngilaq.
- Nuna tamakkerlugu ilisarnaat innuttaasumut pisortallu oqartussaaffiinut iluaqutaasussaavoq, Michael Rosing siunnersuummini allappoq.