Narsaq
Siunnersuut: Neqit mingutsinneqarsimasut piitsunut
Neqit sinnikut neqileriffimmit igitassanngortinneqartut pissakilliortunut tunniunneqartalertariaqaraluarput, politikkikkut oqaaseqartartoq siunnersuuteqarpoq. Naagga, inunnut inuussutissatut piukkunnanngillat, Neqi naliliivoq
Narsami eqqaavissuarmi tulukkat terissallu kaattut ukiup kingulliup ingerlanerani kaattunik allanik peqateqartalerput.
Utoqqalinersiallit inuusunnerumaallu pissakilliortut suliffissuarni eqqakkanik inuussutissanillu mikiaassimasunik aamma ujaasisarput nerineqarsinnaasunik nassaarnissaq neriuutigalugu.
Eqakkat inunnit nassaarsiarineqartut akornanniipput illoqarfimmi Neqip neqileriffianit igitat.
- Kukkunerusoraara toqoraaviup neqinik sipporuttunik igitsiinnartarnera, naak akilernagit tunniutiinnarneqarsinnaasut imaluunniit akikitsunnguanngorlugit tunineqarsinnnasut inunnut pisariaqartitsisunut, massakkorpiarlu inissisimanertik najoqqutaralugu eqqaavissiortariaqartartunut, imaluunniit aserorterivikkoortillugit qimminut
nerukkaatissatulluunniit tuniniarneqarsinnaasut, Inatsisartunut ilaasortaq Siumumilu politikkikkut oqaaseqartartoq, Suka K. Frederiksen, allappoq.
Neqip siunnersuut akerleraa, neqimmi inunnut nerisassatut atorneqarnissaat tulluanngitsuusoq suliffeqarfimmit oqaatigineqarpoq.
Suliffeqarfiup suliami iluanaarniutigalugu ingerlanneqarnissaa pisussaaffiusoq erseqqissaatigaa. Taamaammat Narsami innuttaasunut isumaginninneq eqqarsaatigalugu nerisassanik agguaasarnissaq isumagisassaminut ilaanngitsoq.
Allaaserineqartoq Tamanut Kujataanimi tamaat atuarneqarsinnaavoq. Kommuni Kujallermi pisartut pillugit aviisimi aamma atuartoqarsinnaavoq. Aviisi akeqanngitsumik ataani aajuk: