atuartut angerlarsimaffii

Siunnersuut: Atuartut angerlarsimaffiini atukkat pitsanngorsarneqassapput

Meeqqanut inuusuttunullu atuartut angerlarsimaffiiniittunut atukkat malunnaatilimmik pitsanngorsarneqassapput. Inatsisip allanngortinneqarnissaanut siunnersuutip tamanna qulakkiissavaa.

Doris Jakobsenip atuartut angerlarsimaffiini atukkat pitsanngorsaaviginiarpai

Kalaallit atuartut angerlarsimaffiini atugarisat kinguarsimapput, Ilinniartitaanermut Naalakkersuisoq, Doris Jakobsen tusagassiuutinut nalunaarummi allappoq.

Nalunaarusiat marluk
Meeqqat illersuisuata Tasiilaq pillugu nalunaarusiaanut aamma siusinnerusukkut ilinniartut angerlarsimaffii pillugit nassuiaat suliarineqarsimasoq unnersuussutigai, tassani pitsanngorsaanissaq pisariaqarluinnartoq oqaatigineqarpoq.

- Meeqqat illersuisuata Tasiilaq pillugu nalunaarusiaa atuarakku assut ilinniartut angerlarsimaffiini ilinniartut atugarisaat ernumanartoqartippakka. Ukiut tamarluinnaasa nunaqarfinni atuartut avatangiisit sungiusimasat qimattariaqartarpaat nunaqarfimminni atuarsinnaanermik periarfissaqartinneqannginnamik, ilinniartitaanermut naalakkersuisoq oqarpoq.

- Assorujussuaq pingaartippara atuartut taakkua avatangiisinik toqqissinartunik, nuannersunik aalajangersimasunillu timikkut inooqatigiinnikkullu neqeroorfigineqarsinnaanissaat taamaasillutik alliartornerminni ineriartornerminnilu toqqissillutik nammineersinnaallutillu perorsinnaaqqullugit, Doris Jakobsen tusagassiuutinut nalunaarut naapertorlugu oqarpoq.

Ukiakkut ataatsimiinnermi allannguutissatut siunnersuut saqqummiunneqassasoq, taanna ilisimatitsivoq.

Akimut suleqatigiinneq
- Naalakkersuisut kommunillu suleqatigiissinnaanerannik tassuunalu malittarisassanik ilinniartut angerlarsimaffiinut piumasaqaatinik minnerpaaffiliisinnaanerannillu periarfissiisussaavoq avatangiisit perorsaanermilu killissarititaasut aamma sulisut ilinniarsimassusaat eqqarsaatigalugit. Tamannalu atuartunut peroriartorfimmik toqqissinartumik sunneeqataasussaavoq tassuunalu atuarnermik siunissaqarnermillu pitsaanerusumik tunisisussaalluni, naalakkersuisoqarfiup oqariartuutigaa.

Powered by Labrador CMS