Siunnersuisoqatigiiffik aalisarnermi suleqatigiinnissamik kaammattuisoq

Aalisarnermi politikkikkut suleqatigiinneq nukittorsarneqarli.

Nunani avannarlernni killerni angallannikkut attaveqaateqarnikkullu periusissiamik ataatsimoorussamik suliaqartoqarli.

Taavalu Kalaallit Nunaata, Savalimmiut Islandillu akornanni killilersugaanngitsumik niueqatigiinnissamik isumaqatigiissusiortoqarli.

Nunat Avannarliit Killiit Siunnersuisoqatigiiffiat Reykjavikimi sapaatip-akunnerani siusinnerusukkut ukiumoortumik ataatsimeeqatigiittoqarneranut atatillugu taama innersuussuteqarpoq.

Atuaruk: Lars-Emil Johansen Nunat Avannarliit Killiit Siunnersuisoqatigiiffiannut siulittaasunngussaaq

Aqutsineq nukittorsarneqarli
Siunnersuisoqatigiiffiup aalisarnermut tunngasuni kissaatigaa, naalakkersuisut peqatigiillutik ataatsimoorussamik nassuiaasiussasut, ilaatigut isumalluutinik aqutsinerup nukittorsaaviginissaanut, nunarsuup immikkoortuanit tassannga aalisakkanik tunisassianut niuerfinnut ataatsimoorussamik periusissiorfigineqarnissaannut, immami ilisimatusarnerup suleqatigiissutiginerunissaanut, aalisakkanik misissuinernut avatangiisinullu kiisalu niuerfinnut soorlu EU-mut ajornannginnerusumik isersinnaannissamut periarfissat qulaajarneqarfigisaannik.

Niueqatigiinneq
Tamatuma saniatigut Nunat Avannarliit Killiit Siunnersuisoqatigiiffiata innersuussutigaa, suleqatigiissitamit ataatsimoorussamit nunat taakkua pingasut killilersugaanngitsumik niueqatigiinnissamik isumaqatigiissusiornerisigut nunanilu avannarlerni killerni niuernermut siunnersuisoqatigiiffimmik pilersitsinikkut ataatsimoorussamik iluanaarutissat qulaajaavigineqassasut.

Killilersugaanngitsumik niueqatigiinnissamut isumaqatigiissuteqarnissaq siunnersuisoqatigiiffimmi ukiorpanngortunik oqaluuserineqarsimavoq. Island Savalimmiullu killilersugaanngitsumik niueqatigiinnikkut suleqatigiipput, Hoyvikimik isumaqatigiissut aqqutigalugu piviusunngortinneqarsimasumik. Kalaallit Nunaat qulequtaq tunngavigalugu januaarimi ataatsimeersuarnermi nalunaarpoq, isumaqatigiissutip ilannguffiginnissaanut soqutiginninnani. Kalaallit Nunaat nunani avannarlerni killerni nunanut allanut marlunnut immikkut isumaqatigiissuteqarusunneruvoq, imaluunniit nunat taakkua pingasut akornanni killilersugaanngitsumik niueqatigiinnissamut nutaarluinnarmik isumaqatigiissusiornissamik.

Assartuinermik nalilersuineq
Nunat Avannarliit Killiit Siunnersuisoqatigiiffiata tamatuma saniatigut innersuussutigaa, naalakkersuisut nalilersueqqissaarnermik suliaqassasut nunani avannarlerni killerni assartuinermut attaveqaatinut tunngasunut ungasissoq eqqarsaatigalugu ataatsimoorussamik periusissiornissamut periarfissat qulaajarsinnaajumallugit. Siunnersuisoqatigiiffik isumaqarpoq, nunarsuup immikkoortua taamaalilluni nunat tamalaat akornanni unammilleqatigiinnermi sakkortunerulersimasumi nukittunerusumik inissisimalissasoq.

Aamma atuakkit:

Inatsisartoqarnikkut ukiuni 30-ni suleqatigiissimaneq nalliuttorsiutigineqartoq (qallunaatut)

Kalaallit Nunaat nakorsassaaleqisoq