Siunnersuisooqatigiit
Siunnersuisooqatigiit: Suleqatigiinnermi nunat pilliuteqartariaqassapput
Nunat killiit avannarliit ataatsimoorlutik avammut isumaqatigiissuteqassagunik, taava nunat immikkoorlutik tamarmik arlaatigut pilliuteqartariaqassapput, taama Nunat Killiit Siunnersuisooqatigiivini arfininngornermi oqallittoqarmat inerniliisoqarpoq
Nunat avannarliit killiit ministerii isumasioqatigiinnermi peqataasut arfininngornermi saqqummiussaqarput nunat avannarliit killiit qanoq Issittumi suleqatigiissuteqarsinnaanersut.
Kisianni nunat avannarliit killiit, Island, Savalimmiut aamma nunarput, arlaatigut suleqatigiillutik avammut isumaqatigiissuteqassangaluarunik, taava nunat taakkua tamarmik imminnut pilliuteqarsinnaanissartik naatsorsuutigisariaqaraat saqqummiunneqarpoq.
- Ataatsimoorluta isumaqatiginniuteqarutta isumaqatigiissuteqarluta, taava immaqa pitsaanerusunik isumaqatigiissuteqarsinnaangaluarpugut, islandermiut aalisarnermut nunalerinermullu ministeriat, Sigurður Ingi Jóhannsson, Nunat Avannarliit Killiit Suleqatigiiffianni arfininngornermi oqallinnermi taama oqarpoq.
Ministeri islandimiu: Ataatsimoorluta angusaqarluarsinnaavugut
Atuaruk: Lars-Emil Johansen Issittup imartaani qillerinernut naaggaarpoq
Kisianni nunat avannarliit killiit ataatsimoorussillutik avammut isumaqatigiissuteqassagunik, taava nunat ataasiakkaarlutik arlaatigut pilliuteqarnissartik naatsorsuutigisariaqarpaat.
Naalakkersuisuni suliffeqarnermut, inuussutissarsiutinut, niuernermut nunanullu allanut tunngasuni ilaasortaq, Siumumeersoq Vittus Qujaukitsoq, isumaqarpoq nunarput ullumikkut EU-mut pitsaalluinnartumik isumaqatigiissuteqareersoq, taamaammallu qularnartoq nunat killiit avannarliit peqatigalugit EU-mut nutaamik isumaqatigiissusioraanni pitsaanerulersinnaanera.
- Soorunami ataatsimoorluni EU-mut isumaqatigiinniarneq arlaatigut nukittuunngortitsisinnaavoq, kisianni uagut massakkut isumaqatigiissutigeriikkatsinnit pitsaanerusumik isumaqatigiissummik tunniussaqarsinnaanersoq naluarpoq, tamanna misilerarneqartariaqassaaq, Siumumeersoq Vittus Qujaukitsoq oqarpoq.
Assit takukkit: Siunnersuisoqatigiit ataatsimiinnerat Aasianni aallartinneqarpoq
Atuaruk: Siunnersuisooqatigiit: Issittumi periarfissat atorluartariaqarpavut
Aallartitat sapaammi isumasioqatigiillutik nunani avannarlerni killerni suli annerusumik suleqatigiittoqarsinnaaneranut periarfissat aporfiusinnaasullu oqaluuserissavaat.
- Assigiinngitsutigut suleqatigiissuteqareerpugut. Kisianni uani isumasioqatigiinnermi tikkuarneqartut ilagaat aaqqissuussaanerusumik suleqatigiissinnaaneq, immaqalu aamma nunat akornanni attavigiinnerit annertusarneqarsinnaanerat, Vittus Qujaukitsoq oqarpoq.
Nunat Avannarliit Killiit Isumasioqatigiinnermi peqataatitaat, sapaatip akunnerata naanerani isumasioqatigeereerlutik, sapaammi ualikkut tigussaasunik innersuussaqartussaapput, ilaatigullu siunnersuisooqatigiit siulittaasuat, savalimmiormioq Bill Justinussen, Aasianni isumasioqatigeerermi qanoq ingerlariaqqittoqarsinnaaneranut oqariartuuteqartussaalluni.
Atuaruk: Nunat avannarliit killiit Siunnersuisoqatigiivisa Issittoq samminiarnerulerpaat
Assit: Nunat pingasut - Issittumi immikkoortortaqarfik ataaseq