Siunnersuisooqatigiit: Inatsisitigut ataataqanngitsut allatulli pisinnaatitaaffeqarput

Inatsisitigut ataataqanngitsut pillugit inatsit Folketingimi inaarlugu suliarineqassaaq marlunngorpat. Danskit naalakkersuisuisa taarsiiffiginninnissamut apeqqutip isummerfiginissaa manna tikillugu naaggaartortuarpaat.

Inuit Pisinnaatitaaffiinut Kalaallit Nunaata Siunnersuisoqatigiivisa inassutigaa, Inuit Pisinnaatitaaffiinut Europami Isumaqatigiissut atuutsinneqalermalli inatsisitigut ataataqanngitsut pisinnaatitaaffiisa unioqqutsinneqartuarsimasut pisortatigoormik nassuerutigineqassasoq, aamma kingornussinngitsoornermi suliani matoreersimasuni aningaasanik annaasaqarsimaneq uppernarsaatissaqartillugu taarsiiffigineqarsinnaaneq nutaamik isummerfigineqartassasoq.

Inuit Pisinnaatitaaffiinut Kalaallit Nunaata Siunnersuisoqatigiivini siulittaasoq Aaja Chemnitz Larsen tusagassiutinut nalunaarummi ima oqarpoq:

- Inummik ataqqinnittumik pisussilersorfigineqarnissamut pisinnaatitaaffiup aamma ilagaa nagguigisat kikkuunerisa ilisimanissaannik aamma kina atataatarinerlugu ilisimanissaanik pisinnaatitaaffik.

- Apeqqutit soorlu makku Assigiippugut? Angusisarpunga – ilisarnaataasa ilai kingornussimavakka? Qatannguteqarpunga? Inatsisitigut ataataqanngitsuulluni imminut apeqqutigineqartarput. Taamaasilluni inatsisitigut ataataqanngitsuuneq, nagguigisat affaat ilisimanagit meeravissiarineqalersinermut assersuunneqarsinnaavoq, Aaja Chemnitz Larsen oqarpoq.

Inuit ataasiakkaat ilisimannilernissaminnik pisariaqartitsinerat Inuit Pisinnaatitaaffiinut Kalaallit Nunaata Siunnersuisoqatigiivisa akuerigaa oqarpoq. Aamma sumit kimillu pinngorfeqarnerup inunnut ataasiakkaanut isumaqassusiata inuiaqatigiinnit avatangiisaasunik akuerineqarnissaa nassuerutigineqarnissaalu.

- Tunngavippiaatigut pineqartoq tassaavoq attaveqarsinnaatitaanermik, ilaqutariit ilaattut ataqqineqarnissamut, ilisimanninnissamullu pisinnaatitaaffinnik ilisimanngikkaluarlugu arsaarneqarsimaneq. Attaveqanngikkaanni, ilaallu eqqarsaatigalugit kina ataataginerlugu ilisimanagu, kikkut nagguiginerlugit, inuunerup aqqutaani eqqissinissap nassaariniarnissaanut pisinnaatitaaffiijagaaneruvoq, Inuit Pisinnaatitaaffiinut Kalaallit Nunaata Siunnersuisoqatigiivini siulittaasoq oqarpoq.

Inuit tamarmik assigiimmik pisinnaatitaaffeqartut oqarpoq.

- Inatsisitigut ataataqanngitsut allatulli pisinnaatitaaffeqarput, oqarpoq.

Inatsisitigut ataataqanngitsut qanoq amerlatiginersut ilisimaneqanngilaq, Naalakkersuisut siulittaasuatali Aleqa Hammondip oqaatigaa kisitsit annertusoq ukiullu ingerlaneranni amerliartuinnartut oqaatigalugu.