puisit amii EU-lu
Siunnersuisooqatigiit EU-p sukateriniarnera akuerinngilaa
EU Kommissionip puisinit tunisassiat pillugit Inuit ilaatinneqannginnissaanut maleruagassat sukannernerulersinneqarnissaannut siunnersuutaa piniarneq pillugu siunnersuisoqatigiit akuerinngilaa
Piniarneq pillugu siunnersuisoqatigiit EU Kommissionip Inuit ilaatinneqannginnissaat pillugu peqqussutip allanngortinneqarnissaanut siunnersuummut marsip 12-ani ilisimatinneqarnerminni siunnersuut sakkortuumik akuersaanngilaat. Siunnersuut piniarneq pillugu siunnersuisooqatigiit oqarnerat naapertorlugu ‘puisinniarnermik inuussutissarsiuteqartunut pitsaanngitsumik naleqqutinngitsunillu amerlasuunik kinguneqartitsissammat’.
- Millionilikkaanik puisaateqarpugut, sooq pisuussut piujuaannartitsilluni atuinermik ingerlanneqartoq niuernikkut akornusersoqassava? Siunnersuut silaqassutsimut naleqqutinngilaq arlaannaatigulluunniit akuerineqarsinnaanngilaq, taama oqarpoq piniarneq pillugu siunnersuisoqatigiit siulittaasuat Lars Heilmann, Qeqertarsuarmiit.
Atuaruk: Puisip amia: Kalaallit suleqatigiinnissaat Doris Jakobsenimit ujartorneqarpoq
Atuaruk: Puisit pillugit sakkortusisamik EU-mi siunnersuuteqarnerata IA-mit ernumagineqarpoq
Taamaammat siunnersuisoqatigiit Naalakkersuisut kaammattorpaat siunnersuutip akiorniarneqarnissaanut isumalluutit naammattut immikkoortissagaat.
Tassunga atatillugu piniarnermut naalakkersuisoq, Siumumeersoq Karl-Kristian Kruse, qaammarsaaniummut Inuit Silamut aningaasaliissuteqarniarluni sulinera siunnersuisoqatigiinnit tapersersorneqarpoq.
- Qaammarsaaniarluni suliniut siunertani naapertorlugu sunniuteqarsimavoq, taamaattumik siunnersuisoqatigiinnit innersuussutigineqarpoq suliniut ukiuni amerlasuuni suli ingerlanneqassasoq, Lars Heilmann allappoq.
Atuaruk: Puisip amianik EU-p inatsisinik sukateriniarnera kalaallinit ernumagineqarpoq