Siunnersuisooqatigiit
Siunnersuisooqatigiit: Aajukua kaammattuutigineqartut
Aallartitat ataatsimiisitalianik marlunnik pilersitsisoqarnissaa siunnersuutigigaat, siulittaasup Hoyvíkimi isumaqatigiissutip atorunnaarsinnissaa siunnersuutigaa nunatta isumaqatigiissummi nutaami peqataanissaa siunertaralugu
Nunat avannarliit killiit Aasianni sapaatip akunnerata naanerani isumasioqatigiinnerat naavoq. Aallartitat tigussaasunik marlunnik kaammattuuteqarput, Nunat Avannarliit Killiit Siunnersuisooqatigiivisa ukiaru ukiumoortumik ataatsimiilerunik isummerfigisassaanik.
Kaammaattuutigineqartup aappaa tassaavoq killeqanngitsumik nunat avannarliit akornanni niueqatigiissinnaaneq. Aallartitat kaammattuutigaat Nunat Avannarliit Killiit Siunnersuisooqatigivii politikkerinik inuttalerneqartussamik ataatsimiisitaliamik pilersitsissasut. Kaammattuutigineqarpoq ataatsimiisitaliap nunani avannarlerni killerni inuussutissarsiutinik aallutaqartunut niuernikkut suleqatigiiffimmik pilersitsisoqarnissaanut pisariaqartitsisisoqarnersoq misissuiffigissagaa.
Kaammattuutillu tullia nunani avannarlerni killerni niuernikkut siunnersuisooqatigiinnut tunngavoq. Isumasioqatigiinnnermi aallartitat aamma tassunga tunngatillugu ataatsimiisitaliamik pilersitsisoqarnissaa kaammattuutigaat, ataatsimiisitaliarli atorfilittanik inuttaqassasoq kaammattuutigalugu. Kaammattuutigineqartoq naapertorlugu atorfilittat ataatsimiisitaliami ilaasortaasut nunani avannarlerni killerni pingasuni ullumikkut niueqatigiinnerup inissisimanera misissuiffigissavaat, kiisalu nunat taakkua akornanni, minnerunngitsumillu nunat taakkua nunanut allanut isumaqatigiissutaat aamma misissuiffigissallugit.
Atuaruk: Siunnersuisooqatigiit: Suleqatigiinnermi nunat pilliuteqartariaqassapput
Atuaruk: Ministeri islandimiu: Ataatsimoorluta angusaqarluarsinnaavugut
Siulittaasup Hoyvíkimi isumaqatigiissut atorunnaarsikkusuppaa
Nunat Avannarliit Killiit Siunnersuisooqatigiviinut tigussaasunik marlunnik siunnersuuteqartoqareersoq siunnersuisooqatigiit siulittaasuata, savalimmiormiup Bill Justinussenip, siunnersuutigaa Islandip aamma Savalimmiut Hoyvíkimi isumaqatigiissutertik atorunnaarsissagaat, taarsiullugulu nutaamik isumaqatigiissusiortoqassasoq nunarput peqataatillugu.
Tamanna pivoq nassuerutigineqarmat nunarput Hoyvíkimi isumaqatigiissummut akulerutiinnarsinnaanngitsoq, isumaqatigiissut taanna Islandip Savalimmiullu pisariaqartitatik najoqqutaralugit isumaqatigiissutigimmassuk.
- Taamaammat ilumoorpoq Kalaallit Nunaat nunat taakkua marluk isumaqatigiissutigisimasaannut ilanngutsinniarneqannginnissaa, isumaqatigiissummi taanna nunanut taakkununnga marlunnut tunngavoq, isumaqatigiissutigineqarsimalluni kalaallit kissaataat ilaatinnagit, Bill Justinussen oqarpoq, nangillunilu:
- Taamaammat eqqortuunerpaassaaq nutaamik isumaqatiginninniuteqaraanni. Eqqarsaallu taanna tamaani isumasioqatigiinnermi annertusiartorlunilu tigussaaleraluttuinnarpoq.
Hoyvíkimi isumaqatigiissut Savalimmiut Islandillu killeqanngitsumik niueqatigiissinnaanerat siunertaralugu Savalimmiuni illoqarfimmi Hoyvíkimi aggustip 31-ani 2005-imi isumaqatigiissutaavoq.
Atuaruk: Lars-Emil Johansen Issittup imartaani qillerinernut naaggaarpoq
Assit takukkit: Siunnersuisoqatigiit ataatsimiinnerat Aasianni aallartinneqarpoq