nalunaarusiaq
Siunnersuisooqatigiinnit innersuunneqartut Vittusimit isumaqatigineqartut
Nunarput aningaasaqarnikkut imminut napatittumik aqitsilissappat aaqqissuusseqqittoqartariaqartoq aningaasaqarnermut akisussaasoq Vittus Qujaukitsoq isumaqarpoq
Aningaasaqarnermut Siunnersuisooqatigiit nalunaarusiaanni 'Kalaallit Nunaata aningaasaqarna 2014' saqqummiunneqaqqammerpoq. Siunnersuutigineqartut amerlanertigut isumaqatigalugit aningaasaqanermut naalakkersuisoq Vittus Qujaukitsoq Siumumeersoq oqarpoq.
- Aningaasaqarnikkut aaqqiissutaasinnaasunik arlalitsigut Aningaasaqarnermut Siunnersuisoqatigiit ersarissunik kaammattuuteqarnerat nuannaarutigaara, tamakkunuunami aningaasaqarneq patajaallisarneqarsinnaassammat, Vittus Qujaukitsoq oqarpoq.
- Ineriartortitsinissaq periarfissaqartinniarlugu aningaasaqarnikkut atuinitsinnik annikillisaassutaasinnaasutigut, tassa inuit pilersuisinnaasut ikiliartoraluartillugit pilersugassat amerliartornerisa iluanni aqqiissutissanik ujartuisoqarnera maluginiarpara.Tamatuma kingunerissavaa aaqqissuusseqqinnissap naammassinissaa, taamaalilluni amerlanerusut sulinikkut peqataatinneqarnerunissaat taamatullu aamma siusinaartumik pensionisiaqalersitsisarnikkut inatsit aqqutiginiarnissaat eqqarsaatigalugit, tassalu suliffeqarnerup soqutiginarnerulertinniarnissaa allatullu ajornaraluartumik suliunnaartariaqarnermi toqqissilluni pensioneqalertarsinnaanissaq eqqarsaatigalugit. Tamakku tungaasigut inatsisissat arlallit siunnersuusiorlugit piareersarneqarput, ukiunilu tulliuttuni Inatsisartuni isummerfigisassanngortinneqartussaallutik, tusagassiutinut nalunaarummi Qujaukitsoq oqarpoq.
Aningaasaqarnermut Siunnersuisooqatigiinnit tikkuartorneqartut Sulisitsisut Peqatigiiffiannit aamma isumaqatigineqarput. Aaqqissuusseqqinnerit pisariaqartut Sulisitsisut Peqatigiiffiannit aamma isumaqarput.
- Suli aaqqissuusseqqittoqanngilaq, tamanna ilutigalugu atorfissaqartinneqartut annertusiartuinnavipput, Brian Buus Pedersen marlunngormat oqarpoq.
Takornarissat suliffissaaleqinerlu
Aalisarnerup saniatigut aamma allanik ineriartortitsisoqartariaqartoq Aningaasaqarnermut Siunnersuisooqatigiinnit tikkuarneqarpoq.
- Tamanna Naalakkersuisut isumaqatigiinnarsinnaavaat, massakkullu aningaasanut inatsisissatut siunnersuummi ilatigut umiarsuarmik takornariaqarnerup siuarsarneqarnissaa inuusuttullu suliffissaaleqisut ikilisinneqarnissaat toqqammavissalersugaalluni, Vittus Qujaukitsoq oqarpoq.