Thursday, January 11, 2018 - 18:21

Siunnersorti Kommuneqarfik Sermersuumut millionilinnik akeqarpoq

Assi.: Hans Jukku Noahsen
Siunnersorti Per Bendix Siorarsiorfik pillugu siunnersortaanermini manna tikillugu Kommuneqarfik Sermersuumit 2,3 millioner koruunit sinnerlugit akilerneqarsimavoq.

Siunnersortip Per Bendixip, Hillerødimi ingerlatsivimmit Bendix Consultimeersup, 2016-imi 2017-imilu Kommuneqarfik Sermersooq Frederikssund Kommunelu ataatsikkut sullissimavai, illoqarfiup ineriartortinneqarneranik suliniussuit milliardilinnik akillit qanoq aaqqissuunneqarnissaannik, pilersinneqarnissaannik aningaasalerneqarnissaannillu siunnersortitut.

Manna tikillugu siunnersuinerminit millionilinnik isertitsisimavoq, inissiamik ataasinnguamilluunniit suli sanasoqarsimanngitsoq.

Sermitsiaq aviisi aqagu tallimanngornermi saqqummertussami allappoq.

Millionilikkuutaanik nalilik

Frederikssund Kommunemi DRP4-p allagaatinik takunnissinnaatitaanikkut paasisimavaa Bendix Consult 2016-imi 2017-imilu Vingemi illoqarfiup ineriartortinneqarneranik suliniummut siunnersortaanerminut 4.560.844,50 koruuninik pissarsisimasoq.

Piffissami tassani Nuummi Siorarsiorfimmi illoqarfiup ineriartortinnissaanut siunnersuisuunerminut Kommuneqarfik Sermersuumit 2.351.497,63 koruuninik pissarsisimavoq, tamannalu Sermitsiap allagaatinik takunnissinnaanermik pissarsiaani takuneqarsinnaavoq.

Aningaasat pingaartumik Per Bendixip akissarsiarai, tamatumali saniatigut angalanermut aningaasartuutinut, unnuinernut il.il. katillugit 282.768,76 koruuninut.

Allaaserisaq Sermitsiami aqagu tallimanngornermi saqqummertumi tamakkerlugu atuarsinnaavat. Aviisilu uani pisiassaalereerpoq:

Seneste nyheder / Nutaarsiassat kingulliit