Kusanaatsuliorneq nutaaq
Siunnersorti eqqartuussaasimanini qaqilerneqareersorlu suliunnaartoq
Pinngortitamut, avatangiisinut inatsisinullu atuutsitsinermut naalakkersuisup politikkikkut siunnersortaa, Gerth Platou Jacobsen, ingerlaannartumik atuutilersumik suliunnaarpoq Aasianni politiini pisortaanermi nalaani sakkortuumik nakuusersimasutut eqqartuussaasimanini qaqilerneqareersorlu
Pinngortitamut, avatangiisinut inatsisinullu atuutsitsinermut naalakkersuisup, Atassummeersup Mala Høy Kukop, politikkikkut siunnersortaa, 44-nik ukiulik Gerth Platou Jacobsen, Mala Høy Kukomut politikkikkut siunnersortitut januarimi atorfinitsinneqartoq, pingasunngornermi unnukkut ingerlaannartumik atuutilersumik suliunnaarpoq.
Tamanna pivoq KNR-p qaqilereeraalu Gerth Platou Jacobsen marloriarluni sakkortuumik nakuusersimasutut eqqartuussaasimasoq.
- Mala Høy Kúkomut Naalakkersuisunulluunniit tamarmiusunut akornutaanissara kissaatiginngilara, Gerth Platou Jacobsen KNR-imut taama ilisimatitsisimavoq, KNR-ip pinngortitamut, avatangiisinut inatsisinillu atuutsitsinermut naalakkersuisoq apersorumareeraalu.
Sakkortuumik nakuusernerit taakkua marluk, KNR-ip paasissutissiinera najoqqutaralugu, pisimapput Gerth Platou Jacobsenip Aasiaat Politiivini pisortatut atorfeqarnerata nalaani, nakuusernerullu aappaa aamma pisimavoq pineqartup politiitut biiliani.
Atuaruk: Naalakkersuisup siunnersortimi eqqartuussaasimanera tupaqqassutigigaa
Atuaruk: Naalakkersuisumut immikkut siunnersortimik atorfinitsitsisoqaqqippoq
Ulluni 40-ni inissiisarfimmiitinneqartoq
KNR-ip paasissutissiinera najoqqutaralugu Gerth Platou Jacobsen nakuusersimanini taakkua marluk pillugit Nunatta Eqqartuussisuuneqarfianit pineqaatissinneqarsimasut inissiisarfianniittussanngorlugu ulluni 40-ni pineqaatissinneqarsimavoq.
Eqqartuunneqarnermilu kingorna politiitut sulisinnaanini annaasimavaa.
Gerth Platou Jacobsenip KNR-imut ilanngullugu ilisimatitsissutigisimavaa nammineq nalilersimagini eqqartuunneqarsimanini Naalakkersuisunut inatsisinik atortitsinernut tunngasuni siunnersuisarnissaminut aporfiunavianngitsoq, eqqartuunneqarsimanera ukiut arlallit matuma siorna pisimammat.
Pinngortitamut, avatangiisinut inatsisinullu atuutsitsinermut naalakkersuisup, Mala Høy Kukop, elektromekanikeritut aamma politiitut ilinniarsimasoq Gerth Platou Jacobsen politikkikkut siunnersortissamitut januaarip arfineq-aappaanni atorfinitsippaa.
Mala Høy Kúkop Sermitsiaq.AG-mut nalunaaqutaq pingasunut apersorneqarsinnaanissani akuersissutigaa.