Alaska
Siunissamut ungasinnerusumut aningaasaqarneq pillugu Issitormiut ataatsimeeqatigiilersut
Sapaatip akunnerani uani aningaasaqarneq pillugu ICC Alaskami ataatsimeersuartitsissaaq
'Siunissarput Nammineq Inississavarput'.
Inuit Issittormiut Siunnersuisoqatigiiffiat (ICC) Alaskami Anchorage-mi ataatsimeersuarnissami ulluni 28. – 30. marts ingerlanneqartussami qulequtarineqassaaq.
ICC Alaska ataatsimeersuarnermik qaaqqusisuuvoq naatsorsuutigineqarporlu inuit Alaskamiit, Canadamiit Nunatsinniit Tjukotkamiillu 80-it missaat peqataassasut.
- Ataatsimeersuarnerup siunertaraa killeqarfiit akimorlugit suleqatigiissinnaaneq misissussallugu aammalu inuit nunat tamalaanni suleqatigiissinnaanerat siunertaralugu ataatsimiititamik imaluunniit siunnersuisoqatigiinnik pilersitsinissaq. Taakku siunissaq ungasinnerusoq eqqarsaatigalugu sutigut suleqatigiissinnaaneq misissussavaat, ICC Kalaallit Nunaat paasissutissiivoq.
Aningaasaqarnikkut periarfissat
ICC Kalaalit Nunaanni siulittaasup Hjalmar Dahlip ataatsimeersuartitsinissamik suliniut iluarisimaaqalugu, tusagassiuutinut nalunaarummi oqaatigaa.
- Silap allanngoriartornera avatitsinnit soqutigineqaqaaq, puiussanngilarpulli inunnut tunngasut aamma sammineqartariaqarmata aningaasarsiornikkut periarfissat ilanngullugit, oqaatigaa.
Inuussutissarsiornermut, Suliffeqarnermut, Niuernermut, Nukissiuuteqarnermut Nunanullu Allanut Naalakkersuisoq Vittus Qujaukitsoq aamma Royal Arctic Line-p pisortaa Verner Hammeken ataatsimeersuarnermi saqqummiussisussanut ilaassapput.