Siunissami sulisartussat ingerlatsiviit piareersarpaat
Illoqarfinni sisamani ingerlatsiviit meeqqat atuarfianni atuartut angajulliit pulaartarpaat paasitinniarlugit ingerlatsiviit inuusuttunut sunik piumasaqaateqarnersut
Suliffissarsiornermi CV-mi qanoq allattoqassava? Qinnuteqartut facebookimi qupperneri ingerlatsiviit misissortarpaat, imaluunniit tamanna suliffiup avataani inuunermi eqqissisimatitassaava? Aalisakkanik suliffissuarni ilinniagaqarfik suna atorfissaqartinneqarpa? Qanorlu isilluni AFS-ernissamut ileqqaartoqassava?
Sammisarpassuit
Oqaloqatigiinnerit suliniuaqatigiiffiup CSR Greenlandip ilinniagaqartitsinermut anguniagalimmik suliniutaata ´Ingerlatsiviit atuarfinnut - atuarfiit ingerlatsivinnut´ ilagai.
– Suliniummi anguniagaavoq atuartut meeqqat atuarfianneereerlutik ilinniagaqarfinnut ingerlaqqinnissaannut kajumissuseqalersinnissaat. Oqaloqatigiinnikkut, pulaaqatigiinnikkut, aaqqissuussinertigut aammalu suliatigut inuttullu peqatigiinnertigut atuartunut paasissutissiissutigineqarpoq ilinniagaqarfiit suut ingerlanneqarsinnaasut, suut piumasaqaataasut il.il. Ingerlatsivinnut peqataasunut kajumissaataavoq inuusuttunut qanittuminniittunut tigussaalluinnartumik assigiinngisitseqataagamik, CSR Greenlandimi allattoqarfimmi pisortaq Lotte Frank Kirkegaard tusagassiorfinnut nalunaarutikkut oqarpoq.
Illoqarfiit sisamat
Suliniut ingerlanneqarsimavoq Qaqortumi, Paamiuni, Sisimiuni Aasiannilu.
illoqarfinni tamani atuarfik ataaseq peqataavoq, sumiiffinnilu suliniummut suleqatigiissitaliortoqarpoq, taassuma suliniutit ingerlakkumasatik aalajangertarlugit, pilersaarusiortarlugit ingerlattarlugillu.
Suliniut aningaasatigut tapiiffigineqarsimavoq Nunafondenimit, Grønlandsbankens Erhvervsfondimit aammalu Sparinvestimit.
Sumiiffimmi aqutsisoqatigiit
Illoqarfinni sisamani taakkunani atuarfinnit peqataasunit sinniisut siorna aasakkut atuanngiffeqalernissaq sioqqulluguli ataatsimeeqatigisimavaat sumiiffinnilu tamani aqutsisoqatigiinnik pilersitsisoqarpoq.