Mere skoletilfredshed
Siunissami sapaatip akunneri tamaasa akerliussutsimik takutitsisassaagut
Marlunngormat Narsap Atuarfianik, inuit peqqissusaannik ulorianartorsiortitsisumut, innuttaasut naammaginninngitsut pakatsinertik takutippaat
Marlunngormat ullaap tungaani inuit 150-it missaanniittut, angajoqqaat, aanaakkut/aataakkut meeqqalluk Narsami atuarfimmi pissutsit ajorluinnartut naammaginagit akerliussutsimik takutitsipput.
Tamakkua oqaaseqartartuata Susanne Godtfredsenip oqaatigaa angajoqqaat qatsukkaat Narsap Atuarfiata affaata matoqqanera, aammalu atuarfiup oqoqarnera, asbesteqarnera, PBC-qarnera, oqimaatsunik saffiugassaqarnera radiollu qinngornerinik ulorianartoqarnera pissutigalugit meeqqat napparsimajuartarnerat qatsukkaat.
Susanne Godtfredsen sioorasaarivoq pissutsit iluarsineqarnissaasa tungaanut sapaatip akunneri tamaasa akerliussutsimik takutitsisoqartassasoq.
Akerliussutsimik takutitsineq pilersaarusiorneqarsimavoq Kommune Kujallermi Atuarfinnut Ulluuneranilu Paaqqinnittarfinnut Ataatsimiititaliap Narsami ataatsimiinneranut atatillugu.
Ataatsimiititaliap siulittaasua Karla Bisgaard angusassanik piviusunik neriorsuuteqarsinnaanngilaq, ataatsimiititaliarli sinnerlugu neriorsuilluni sapinngisaq tamaat atuarfiup nutaap sananeqarnissaa siuarsarniarniarlugu.
Ataatsimiititaliami ilaasortaapput Karla Bisgaardip saniatigut Debora Kleist, Kaj Lyberth aamma Benjamin Kielsen, tamarmillu ataatsimiinnermi peqataapput.
Atuaruk "Angajoqqaat: Atuarfik Mathias Storch matuneqarli"
Marlunngormat aamma saqqummiunneqarpoq Ilulissani atuarfiup aappaa Atuarfik Mathias Storch ima oqoqartigisoq, angajoqqaat maanna piumasarilerlugu ukiup atuarfiusup nutaap aallartinnginnerani atuarfk matuneqassasoq.