Siunissami nunami ikuallattut amerlanerit

Nassuttuumi qeqertaasaq ikuallattoq takusatsinnit kingulliunavianngilaq.

Siunissamimi amerlanerusunik nunami ikuallattoqartalernissaata ilimanaateqarnera ilimagisinnaavarput. Silammi pissusaata allanngoriartornerata takutippaa kiannerulissallunilu panernarnerulissasoq.

-Siunissami Kujataani Kitaanilu panernarnerulissasoq, modelliliatsinnit erserpoq, Dr. Ruth Mottram DMI-minngaanneersoq Sermitsiaq.AG-mut oqarpoq.

Panernarnerusoq

Ulluni amerlanerusuni parnernarnerulerlunilu piffissamilu sivisunermi panernarnerulissasoq, modellit takutippaat. Ukiunilu kingullerni 20-ni kissatsikkiartornera ilutigalugu, inerniliussassaq ersarippoq.

-Amerlanerusunik ikuallattoqalernissaanut patsisissat amerlapput, Ruth Rottram oqarpoq.
Professori Lund Universitetimi, Torben Røjle Christensenip taassuma naliliineranut isumaqataavoq.
- Kiannerulerpat panernarnerulerpalli nunami ikuallattoqalernissamut aarlerinassuseq annertusissaaq, taanna Sermitsiaq.AG-mut oqarpoq.

Issumik ikuallannerit

Piffissami sivisunermi panernarnerulerpat Kalaallit Nunaata pinngortitaani issoqarfioqisoq panernangaatsiassaaq, aammalu ikikkuminarnerulerlunilu siaruaatipallassinnaanerulissaaq.
- Akulikinnerulernissaa qularnanngilaq, Torben Røjle Christensen oqarpoq.
Ikuallannerilli silap pissusaata allanngorneranut attuumassuteqarnersut oqaatigineqarsinnaanngitsut, Torben Røjle Christensenip Ruth Mottramillu erseqqissaatigaat.

Ikuallannerit inunnit pilersitat

Ikuallattoqalernissaanut aarlerinarneruleraluartoq pinaveersaarutaasinnaasoq ersarippoq. Kalaallit Nunaani nunami ikuallannerit amerlanerpaartaat inunnit pilersitaapput.
- Kalaallit Nunaani qaqutigorluinnaq kallertartpoq, sapaatillu akunnerini kingullerni piffinni nalaataqarsimanngilagut, Turh Mottram oqarpoq.

Paasisaatali ilangisimavaat eqqarsaatigilluarnagu innermik atuisarneq tamatumunnga patsisaasinnaasoq.

-Nunami ikuallannerit inoqarsimatillugu pilertarput, assersuutigalugu Kangerlussuarmiit Sisimiunut nunakkut aqqummi, taanna oqarpoq.