Siumut: Kangerlussuaq Qeqqata Kommunianit ingerlanneqalersinnaavoq

Kangerlussuup Narsarsuullu siunissami qanoq pineqarnissaat partiinit paaserusunneqarpoq

Qeqqata Kommuniata Kangerlussuup ingerlalernissaa soqutigaa.

Tamanna Siumut Inatsisartuni gruppianit aamma taperserneqarpoq.

- Qeqqata Kommunia Kangerlussuup ingerlanneqalernissaanut atatillugu selskabiliorniarpoq. Siumumit taamatut iliuuseqarniarneq tapersersorparput, tassami inuussutissarsiornerup takornariaqarnerullu tungaatigut periarfissaqarluartoqarpoq. Sisimiunit Kangerlussuarmut aqquserngiortoqarsinnaappat mittarfiup piuginnarnissaa qulakkeerneqassaaq, Anders Olsen oqaluttarfimmit oqarpoq.

Narsarsuaq pillugu oqallinnermi oqaatsit toqqaannannginnerupput.

- Namminersorlutik Oqartussat, inussutissarsiornermik suliaqartut, kommuni innuttaasullu suleqatigalugit Narsarsuup siunissamut periarfissai eqqartorneqassapput, Anders Olsen oqarpoq.

Erseqqissaasoqarnissaanik piumasaqaat
Mittarfiit pillugit suliap naammassinnginnerani Narsarsuup Kangerlussuullu siunissaat erseqqissumik qanoq siunissaqarnersut nalunaarutigineqartariaqartoq Inuit Ataqatigiinnit piumasarineqarpoq.

- Apeqqutit amerlasuut akissutissarsiffigineqarsimanngillat. Kangerlussuaq eqqarsaatigalugu siunissami sakkutooqarfittut atuinnarneqassanersoq suli erseqqissumik akineqanngilaq.

Atassutip Suleqatigiissitsisullu erseqqissumik nalunaartoqarnissaa piumasaraat. Partii Naleraq isumaqarpoq Narsarsuaq Kangerlussuarlu matuneqarnatik ingerlatiinnarneqassasut.

Jens Napaattuup oqaatiginngilaa tamanna qanoq aningaasalerneqassasoq, kisianni 1.200 meterinik takitigisumik mittarfiliortoqarnissaanik misissuisoqarnissaa soqutigineqarpoq.

Powered by Labrador CMS