Siumut: Illoqarfiit mikinerit tamarmik illunut sanaqataaffiusunut aaqqissuussamut ilaallik

Kangaatsiami, Qaanaami Ittoqqortoormiinilu illunut sanaqataaffiusunut taarsigassarsiat pillugit periarfissaqartariaqartumi siunnersuummi allatut aaqqiisoqartariaqartoq Siumut isumaqarpoq. Siunnersuut nunaqarfinnut illoqarfinnullu mikinerusunut atuuttariaqartoq siunnersuutigineqarpoq.

Anders Olsen, Siumut, Nanortalik

Illunut sanaqataaffiusunut taarsigassarsiat pillugit siunnersuut Inatsisartuni pingasunngormat oqaluuserineqarpoq.

Peqqussummi atuuttumi inoqutigiit akileraaruserneqartussanik agguaqatigiissillugit 450.000 kr.-it sinnerlugit ukiumut isertitaqarpata illumik illulioqataaffiusumut taarsigassarsisitsisoqarsinnaanngilaq. Siunnersuutigineqarpoq killiliussaq taanna 600.000 kr.-inut qaffanneqarlunilu aalajangersarneqassasoq.

Siunnersuut Kangaatsiami, Qaanaami Ittoqqortoormiinilu atuunnissaa siunnersuutigineqarpoq.

Tamanna Siumumit Anders Olsenimit isornartorsiorneqarpoq.

- Siumumi isumaqarpugut nunatta siammasissumik najugaqarfigineqarnera illersugassaasoq, tassalu inoqarfiit tamarluinnaasa sutigut tamatigut ineriartortinneqarnissaat qulakkiisagipput, ineqarniarnikkut illussaqarniarnikkullu aamma, tusagassiutinut nalunaarummi allappoq.

- Siumumi isumaqarpugut ajornanngippat illoqarfiit tamarmik periarfissaqarsinnaasariaqartut, taamaattorli Siumumiit naapperiutissatut pingaarnertut aallaavigerusullutigu minnerpaamik illoqarfiit kommuunini qitiusutut inissisimasut avataaniittut tamarmik sanaqateqarluni illuliortiternermut aaqqissuussamut periarfissaqartariaqartut, Anders Olsen allappoq.

Nunaqarfinni illoqarfinnilu mikinerusuni amerlasuuni sanaartornerit ukiuni kingullerni ilaatigut annertuumik annikillisimasut, taamaattumillu ineqarniarnikkut illussaqarniarnikkullu suliniutit pitsaasut inoqarfinnut pineqartunut amerlanerpaanut iluaqutissanngortinniarneqartariaqartut Siumumi isumaqarput.

Powered by Labrador CMS