Siumut: Ileqqorissaarneq marlunilluunnit ilaasortaaffeqarneq
Siumumi politikeri Lars Poulsen Nuumminngaanneersup, partiimi siuttut amerlanerussuteqartut aalajangingaannik avaqqutaarinninerat pissutigalugu Kommuneqarfik Sermersuup kommunalbestyrelsianut ilaasortaalersinnaannginnini pakatsissutigaa.
Siumumi siulittaasut, siulittaasoq Kim Kielsen, siulittaasup tullia Karl-Kristian Kruse aamma partiip allattaa Mikael Petersen, partiimi ilaasortat marlunnik qinigaaffeqartarnerup atorunnaarsinneqarnissaanik siorna ataatsimeersuarnermi amerlanerussuteqartunit aalajangiunneqarsimasumik avaqqutaarinnipput.
Maleruaqqusanik misissuineq
Inatsisartuni kommunalbestyrelsimilu ataatsikkut ilaasortaaffeqartarneq atorunnaarsinniarlugu amerlanerussuteqartut aalajangiinerat Siumumi aqutsisut maleruaqqusanik misissuinikkut qanoq avaqqunneqarsinnaaneranik nassaarput.
Ukioq manna aprilimi Inatsisartunut qinersinerup kingorna 33-nik ukiullip Lars Poulsenip siullertut sinniisussaanini pissutigalugu Kommuneqarfik Sermersuumi kommunalbestyrelsianut Laura Táunâjimmut paarlaasussanngornini qularutigisimanngilaa.
Ullut sapaatip akunnerilu ingerlanerini taama pisoqarsimannginnera taassuma tupingusuutigisimavaa. Marlunnimmi qinigaaffeqartarnerup atorunnaarsinneqarnissaanut aalajangiisimaneq pissutigalugu kommunalbestyrelsimut ilaasortanngornissaq pillugu saaffigineqarnissani naatsorsuutigisimangaluarpaa.
Aporfissaqartuaannartoq
- Pisoq pillugu partiimi paasiniaatillunga allaaneq ajorpoq aporfissaqartuaannartoq. Sooq susoqarsimannginnera, ersarissumik akissuteqarfigineqanngisaannarpoq, Lars Poulsen, partiip siulittaasoqarfiani qanoq ingerlatsisoqarnera pillugu tallimanngormat Sermitsiaq.AG-p allaaserisaqarnerata kingorna aatsaat paasisaqarsimasoq, Sermitsiaq.AG-mut oqarpoq.
Mala Høj Kukop Atassummiit nuussimasup, Atassummi ilaasortaasimasumit allamit maanna Demokraatini ilaasortaasumit Steen Lyngemit taarserneqartussaangaluarnera, pissutigalugu Kommuneqarfik Sermersuumi sunniuteqarsinnaanermik annaasaqarnissaq kissaatigineqanngitsoq, partiip allattaata Mikael Petersenip nassuiaatigaa.
Nassuiaatissaqanngitsoq
Mikael Petersenillu nassuiaatissaqartinngikkallarpaa, partiimi siuttut sooq Mala Høj Kukomut taamaallaat atuuttussamik immikkut maleruaqqusamik atuutilersitsisoqarniannginnersoq.
Siumuminngaanneersut sisamat allat kommunalbestyrelsimi ilaasortaasut, ukioq manna aprilimi Inatsisartunut qinersinerup kingorna ilaasortanngorput. Taakku tassaapput Laura Taunajik, Jess Svane, Nikkulat Jeremiassen aamma Anders Olsen. Taakku tamarmik Siuminngaanneersunik sinniisussaqarput. Taakku partiimi aqutsisut aaqqiissuteqarnerisigut marlunnik ilaasortaaffeqarlutillu marlunnik akissarsiaqaannassapput.
109-nik qinersisoqartoq
Lars Poulsen Siumut Inuusuttaani ilaasortaavoq 2017-imilu kommuninut qinersisoqarnerani 109-nik qinersisoqarsimalluni.
- Siumut Inuusuttaani siulersuisut attaveqarfigisarpakka, taakku Siumut Inuusuttai septembarimi ataatsimeersualerpat pisup eqqartorneqarnissaanik neriorsuuteqartarput, Lars Poulsen, partiimi siuttut amerlanerussuteqartut aalajangiinerannik avaqqutaarinninnerat ileqqorissaarnertut isiginagu, paasissutissiivoq.
NutaarsiassatDMI Tasiilami Kategori 2-mik sakkortussuseqartumik anorersuarnissaanik aarlerisaarivoq, 6. marsi 2024 nal. 09.00-imiit 7. marsi 2024 nal. 01.00-imut atuuttussamik. Anorersuaq sekundimut 25...
Aputit, nipilersortut ataatsimoornerillu nuannersut sammereerlugit ukioq manna Snow Fest sapaatip akunnerata naanerani naammassineqarpoq. Pisortatigoortumik ajugaasup...