Siumut Sisimiut: Saarullinnik tunisinermi unammilleqatigiinneq eqqunneqarli

Sisimiuni aalisartut saarullinnik tunisinissamut pitsaanerusunik periarfissinneqanngikkunik umiarsualivimmik assiinissamik aarlerisaarinikuupput. Taamatullu aamma Siumup Sisimiuni immikkoortortaanit piumasaqartoqarpoq, akinillu unammilleqatigiittoqarnissaanik kissaateqarlutik.

Atuaruk: Umiarsualivimmik assersuinissamut aalisartut piareeqqasut

- Sisimiuni aalisartortagut ukiorsuaq kipiluttunartumik ingerlavigereerlugu, maannakkut aasarnerani saarullerpassuaqarnerani tunitsivissaaleqineq pissutigalugu aningaasanik isaatitsinnaannginneranni piaarnerpaamik aalisarnermut naalakkersuisoq Karl-Kristian Kruse iliuuseqartariaqarpoq. Tunitsiviit malinnaasinnaanngimmata Saarullinnut umiarsuarmik tunitsiviliinissamut akuersissuteqartariaqarpoq, Siumut Sisimiuni siulittaasoq, Lars Jørgen Kleist tusagassiuutinut allappoq.

Aalisarnermut naalakkersuisoq isornartorsioraa
Siumup Sisimiuni immikkoortortaani siulittaasup parteeqatini, aalisarnermut naalakkersuisoq Karl-Kristian Kruse isornartorsiorpaa.

- Ataasiaannarnata maanngaaq Sisimiuni aalisartut aalisarnermut naalakkersuisoq Karl-Kristian Kruse misillerfigaat. Soorlu assersuutigalugu upernaaq nipisanniarnermi aningaasarpassuarnik annaasaqarput kingusinaarpallaartumik aalisarsinnaanermut akuersissut tunniunneqarmat, Lars Jørgen Kleist oqarpoq.

Taassumalu aalisarnermut naalakkersuisoq inassuteqarfigaa umiarsuarmik tunitsiviliinissaq periarfissinneqassasoq.

- Aalisarnermut Naalakkersuisoq Karl Kristian Kruse piaarnerpaamik iliuuseqartariaqarpoq, maannakkut Sisimiuni aalisartut piginneqatigiit Enoksen Seafood A/S angallataat Sisimiuni piareeqqavoq saarullinnik tigooraanissamut. Enoksen Seafood A/S ullormut 43 tonsit tunisassiarisinnaavaat, Siumut Sisimiuni siulittaasoq, Lars Jørgen Kleist naggasiivoq.

Atuaruk: Ullormut tulaassuisoqannginneraniit 40 tonsinik tulaassuinermut