ineqarneq
Siumut Sisimiut: Akissaatikinnerit nammineq initaarnissaminnut periarfissarsiunneqartariaqarput
Ini pillugu isumasioqatigiittoqartariaqartoq Siumup Sisimiuni immikkoortortaqarfianit piumasarineqarpoq. Init attartortittakkat akisuallaarneri kiisalu kiassarnermut akiliutit eqqartorneqartariaqartut siulersuisunit oqaatigineqarpoq
Nuna tamakkerlugu Inimi attartortuni 398-ini akiitsoqarnertik pissutigalugu anisinneqarnissaminnut ulorianartorsiorput, taakkunanngalu Inissiaatileqatigiiffimmit inimeersut 394-iupput kiisalu Inissiaatileqatigiiffimmit Illuutinit sisamaallutik.
Nunatsinni kommuunip avannarlersaanni inunnik isumagininnermi ataatsimiisitaliap siulittaasua, Siumumeersoq Jess Svane, kommuunip inunnik isumaginninnermi ataatsimiisitaliaani siulittaasutut, Qaasuitsup Kommuniata borgmesterianut, Siumumeersumut Ole Dorphimut, qaammammi uani piumasaqarpoq misissuisoqassasoq nuna tamakkerlugu inissianut attartortakkanut akiitsut qaffakkiartorneri pilllugit isumasioqatigiittoqarsinnaaneranut.
Parteeqataatai Qaasuitsup Kommuniani kommunalbestyrelsimi ilaasortaq Palle Jerimiassen aamma Inatsisartuni ilaasortaq Ineqi Kielsen nuna tamakkerlugu isumasioqatigiittoqarnissaa aamma tapersersorpaat.
Tapersiineq
Siumup Sisimiuni immikkoortortaqarfiata ataatsimeersuarnerani februaarip qulingani ingerlanneqartumi, isumasioqatigiisitsisoqarnissaanut oqariartuuteqartut taperserneqarput.
Siumut Sisimiut isumaqarpoq Inimi init attartittakkat akisuallaarneri, kiassarnermut akiliutit minnerunngitsumillu boligsikring-imut tunngasut ilaatigut isumasioqatigiinnermi eqqartorneqartariaqartut.
- Taassuma saniatigut isumaqarpugut initaarniarnissamut aningaasalersueriaatsit pitsaangorsartariaqartut aamma akissaatikinnerit nammineq initaarnissaminnut periarfissarsiunneqarnissaat misissiffigineqarlutik. Illulioriaaseq pitsanngorsartariaqarpoq kinguaassatta maannakkut atukkagut inissiarsuit aserfallassimaqisut atussanngippatikkit, Siumut Sisimiuni siulittaasoq Lars Jørgen Kleist tusagassiuutinut nalunaarummi allappoq.
Siumut Sisimiut ataatsimeersuarnerani nutaanik siulersuisoqalerpoq. Siulersuisunngortuupput:
- Lars Jørgen Kleist - Siulittaasoq
- Søren Alaufesen - Siulittaasup tullia
- Ejnar Lundblad - Aningaaserisoq
- Hans Kristian Petrussen - Allatsi
- Frederik Olsen - Siulersuisuni ilaasortaq
- Amalie Kleist - Sinniisussaq
- Kristina M. Kleist - Sinniisussaq