Royal Greenland

Siumut Royal Greenlandimut: Tuniniaasoqarfik Nunatsinnut nuunneqarli

Royal Greenlandip rekordiliilluni sinneqartoornera partii Siumumit nersualaarneqarpoq. Tamanna pissutigalugu suliffeqarfiup suliffiutai Danmarkimiittut Nunatsinnut nuunneqarnissaannik partii kaammaattuuteqarpoq.

ip niuernermut immikkoortortaqarfimmi suliffiutai 200-ut missaanniittut Danmarkimiik Nunatsinnut nuunneqassasut, Siumut isumaqarpoq. Royal Greenland

- Nunatta aqunneqarnerani annertuumik piumasaqaateqarfiugaluartumi taamannak angusaqarnermikkut nunamut inuiaqatigiinnullu annertuumik iluaqusiisussanngormat siunissamullu isumalluarnissamik annertuumik tunngavissaqartitsilerlutik. Aammalu minnerunngitsumik tunitsivinnik inerisaanerup annertuumik ingerlanneqartup suli ingerlateqqinneqarnissaanik siunertaqarnerat iluaquseeqqittussaasoq qularutissaanngilaq, Siumup politikkikkut oqaaseqartartua, Karl-Kristian Kruse tusagassiuutinut nalunaarummi oqarpoq.

Tunitsiviit amerlanerit

Inatsisartuni Siumup gruppiata sumiiffinni assigiinngitsuni aalisartunut tunitsiviit piginnaasaqarnerunissaannik piumasaqarfiusut inerisaqqinneqarpata suli angusat Royal Greenlandimut annertuneruleqqinnissaat qularutigineqanngitsoq, taanna paasissutissiivoq.

Suliffeqarfimmi ullumikkut 2.769-it sulisorineqarput, ukiunilu kingullerni Nunatsinni sulisut 200-nik amerlineqarsimallutik. Niuernermut immikkoortortaqarfik Danmarkimiippoq, tassanilu 197-it sulisorineqarlutik. Taakku tuniniaanermik suliaqartut Nunatsinnut nuunneqarnissaat Siumup kissaatigaa.

Niuernermik immikkoortortaqarfik nuunneqarli

- Royal Greenlandip niuernermi sulisorpassuisa Danmarkimiittut Nunatsinnut nuunneqarsinnaasortaasa nuunneqarnissaat eqqarsaatigilluarneqassasoq Siumumit kaammattuutigaarput, tusagassiuutinut nalunaarummi allaqqasoqarpoq.

Powered by Labrador CMS