siulittaasussarsiorneq

Siumut Qaqortup Kim Kielseni partiimi siulittaasunngornissaa innersuuppaat

Kim Kielsenip Siumumi siulittaasunngornissaa Qaqortumi neriuutigineqarpoq, Nanortalimmi Narsamilu suli isummertoqanngilaq

Qaqortumi Siumup immikkoortortaani siulittaasoq, Lars Lundblad

Naalakkersuisut siulittaasorigallagaat Kim Kielsen, Siumut, partiip Nuummi immikkut ittumik ataatsimeersuannginnerani siulittaasussatut qinigassanngortinnera Siumut Qaqortumi tapersersorneqarpoq.

Doris Jakobsen aamma Nick Nielsen aamma qinigassanngortipput.

Kisiannili Kim Kielsen, Paamiuninngaannertoq, Siumumi kujataarmioqataasa tapersersussagaat ilimanarnerpaavoq.

Qaqortumi Siumup immikkoortortaani siulittaasoq, Lars Lundblad kina siulittaasussatut piukkunnerunerini qulanngilaq.

- Kim Kielsenip inatsisartuni aamma Naalakkersuisuni ilaasortaanermini allaleriarluni ornilluta ataatsimeeqatigisarpaatigut, soorluttaaq aamma politikkikkut anguniakkatta qanoq ittuunissaa sunniuteqaqataaffigisarsimagaa. Suleqatikkuminartuuvoq, piginnaasaqarluarluni, politikkikkullu siunnerfeqarluartumik ingerlatsisarluni. Taamaattumik Kim Kielsen siuttussatut isumalluarfigaarput, Lars Lundblad oqarpoq.

Nanortalimmi Narsamilu Siumumi immikkoortortaqarfii suli kina siulittaasutut innersuutissanerlugu aalajanginngilaat.

Kommune Kujallermi pisartut pillugit Tamanut Kujataanimi atuarneqarsinnaapput. Aviisi akeqanngitsumik ataani aaneqarsinnaavoq:

Powered by Labrador CMS