Siumut: Pituffimmut oqartussaaffik tiguneqarli

Naalakkersuisut aningaasarsiornikkut aaqqissuusseqqinnissat suut tullinnguunnersut pillugit oqallitsitsiniarlutik piareersarsimapput. Kisianni Inatsisartuni ilaasortat allanik namminneq oqaluusererusutaminnik peqartut sukkasuumik paasinarsivoq.

Siumumeersup Jens Immanuelsenip oqaaseqartartutut siullertut saqqummiussinermini Pituffiup amerikamiunit sakkutooqarfittut atorneqarneranut qanoq aningaasarsiorfigineqarsinnaanera politikkikkut pilersaarusiorfigisimaaa.

- Piffissanngorpoq allaffissornikkut Pituffik pillugu isumaqatigiissuteqarnerup qanoq nunatsinnit akisussaaffigilerneqarsinnaanera qiviassallugu, Jens Immanuelsen aallartippoq.

Sakkutooqarfimmit aningaasat amerlanerusut
Pituffimmi sakkutooqarfiup inuiaqatigiinnut 100 millioner koruuninik ukiut tamaasa isertitsiffiusarsimanera Siumup oqaaseqartartuanut naammanngilaq.

- Aningaasanik Pituffimmit isaatitsinerulissaagut. Siumumit naammagittarsinnaanerput killeqariartulerpoq, nunattami karsianut isaatitsinissaq pisariaqalivippoq, isaatitsinerlu nunatsinnit tamarmit pissaaq, Jens Immanuelsen Inatsisartut oqaluttarfiannit ilaatigut oqarpoq.

‘Oqaaseqarusunngilaq’
Siumumeersoq Vittus Qujaukitsoq, inuussutissarsiornermut, suliffeqarnermut, niuernermut nunanullu allanut tunngasunut naalakkersuisoq, Jens Immanuelsenip marlunngornermi siunnersuutaanut tapersersuinerluni akerliunerluniluunniit oqaaseqarusunngilaq.

- Apeqqut taanna maanna isummerfigerusunngilara, oqallinneq taanna tikikkumaarparput illersornissamut politikki kingusinnerusukkut sammilerutsigu, oqarpoq.

- Apeqqut taanna maanna Inatsisartuni politikerinut oqallisigerusunngikkukku, taava oqallisiginissaanut suna tulliulluni aallarniutaassava?

- Suliassaq imaannaanngitsutut isigaarput, taamaattumillu aamma torersumik naammassinissaa pisariaqarpoq. Kisianni suliassaq eqqartoqqissaqqaarparput, kisianni qaqagu oqaluuserissaneripput suli ullulerneqarnikuunngilaq, Vittus Qujaukitsoq akivoq.