Siumut: Ilinniarsimanermik sallulluni nalunaarsuineq nunatsinni ajornartorsiutaava?

Air Greenlandimi kiisalu Tele-Postimi pisortaanerusimasup Michael Binzerip ilinniarsimanngisaminik nalunaarusiortarsimanera suli tupassutigineqarlunilu pakatsissutigineqarpoq. Naalakkersuisut siulittaasuata Naalakkersuisoqarfiani saaffiginnittoqareernerata kingorna nassuerutigaa suliffinnut qinnuteqaraangami ilinniarsimanngisaminik ilanngussisarsimalluni.

Siumut tunuliaqutaralugu Inatsisartunut qinigassanngortittup Lars-Jørgen Kleistip tamanna Nunatsinni ajornartorsiutaanersoq paaserusuppaa.

- Inuit amerlasuut uattuulli pakatsisimassaqaat Michael Binzer-ip salluliortarsimanerminik nassuerutiginnilluni nalunaaruteqarmat, tassami isigisimavarput tatiginartutut ilinniarluarsimasutullu, Lars-Jørgen Kleist tusagassiutinut nalunaarummi allappoq.

- Nunatsinni innuttaasutut politikkeritullu, eqqarsaqqajaanarpoq aperisariaqarluni ilumut ilinniarsimanermik sallulluni nalunaarsuisarneq nunatsinni ajornatorsiutaanersoq.

Transparensy akuusariaqartoq
Ilinniarsimanngisanik paasissutissanik ilanngussisarneq nunani allani ajornartorsiutaasoq Nunatsinni qanoq ajornartorsiutaatiginersoq paaserusuppaa.

Transparency International Greenlandip sulissutigaa Kalaallit Nunaanni peqquserlulluni iluanaarniarnermik ingerlatsisoqannginnissaa.

- Isumaqarpunga, pissusissamisuussasoq Transparency International Greenland Namminersorlutik Oqartussat suliffeqarfissuini imaluunniit pisortat suliffeqarfiini qullersanik atorfinitsitsisarnerit misissuiffigippatigit nalunaarusiaralugu – taamaasilluta kukkusumik atorfinitsitsisarnerit pinngitsoortinneqarsammata, Lars-Jørgen Kleist oqarpoq.

Transparensy inuttanik amigaateqartut
Siumut tunuliaqutaralugu qinigassanngortittup siunnertuutaa Transparency International Greenlandip siulittaasuata Anita Hofferip tigulluarpaa.

- Inuiaqatigiinnut ammanerusumik sulisoqalernissaa anguniagaraarput. Peqatigiiffiuvugut angivallaanngitsoq, misissuissagaanni annertoorujussuarmik sulisariaqassaagut. Annertuumik suliaqarnissarput ajoraluartumik pisinnaanngilaq peqatigiiffitsinni amerlavallaannginnerput pissutaalluni, Anita Hoffer Sermitsiaq.AG-mut oqarpoq.

Transparency International Greenlandimit paasissutissanik siammarterinissamik suliaqarnissamut takorluugaqartoq Anita Hofferip oqaatigaa. Paasissutissat Namminersorlutik Oqartussanut, Namminersorlutik Oqartussat suliffeqarfiinut siulersuisuni ilaasortat kiisalu kommunit aktiaatillit siunnerfigineqartut oqaatigaa.

- Nunani allanitulli misissuisartunik sulisoqanngilagut ajoraluartumik, Anita Hoffer oqarpoq.

Tele-Postip siulersuisui pisortaanerusimasumut Michael Binzerimut isumaqatigiissutiminnik atorunnaarsitsiniarlutik sapaammi aalajangerput. Taamatuma kingorna pisortaanerusimasoq soraarniuteqarnermi nalaani qaammatip qulit missaani aningaasarsiaqassanngilaq.