uran pillugu oqallinneq
Siumut: IA uranimut qularsaariunnaarniaritsi
Uran pillugu qularsaarineq Siumukkormiut qatsulluinnarpaat
Siumukkormiut qularinngilaat uranimut naaggaarluinarnerup atorunnaarsinnissaa kujataamiut taperserumaaraat taamaasilluni aatsitassat qaqutigoortut piiaarneqarsinnaanerat ammaanneqassammat. Partii isumaqarpoq uranitalinnik atuinerup pitsaasortai aamma isiginiarneqartariaqartut.
Inatsisartuni kujataanilu uran pillugu oqallinnermi illuatungeriit imminnut qanilliartunngivipput. Tikkuussisumik kujataani innuttaasut taasitinneqartussaapput uranimut naaggaarluinnarnerup atorunnaarsinnissaa pillugu. Siumukkut qularinngilaat amerlanerussuteqartunit tamanna ilalerneqarumaartoq.
Siumup aamma innersuuppaa uran nukissiutinut mingutsitsinngitsunut atorneqarsinnaasoq.
- Maluginiaqqunngitsoorusunngilara, piffissami, mingutsitsinerup ukkatarineqarnerani atomi atorlugu nukissiorfinnik pilersitsinissamik soqutiginninneq qaffakkiartorsimammat, taamaa-liorluni nukissiorneq mingutsitsineq ajormat aattoornikkut ajunaarnersuaqartoqartinnagu. Tamanna ukiuni kingullerni 20-ini nunarsuatsinni marlussoriarluni pinikuuvoq, qinngornerit ulorianartut aniasoorneranni, navialisitsingaartumik, Per Berthelsen oqarpoq.
Uranimut naaggaarluinnarneq Siumukkormiut atorunnaarsinniarpaat aatsitassanik qaqutigoortunik uranitaqarsinnaasunik qalluinissamut aningaasaleerusussuseq qaffassarniarlugu.
- Taamaattumik suut tamarmik qimerlooraanni ersisaarinermi pineqartorpassuit tunngavissaqanngillat, ”Piaanngilluinnarnissamik isummersimaneq” ingerlariaqqinnaveersaartitsisuuvoq, pisuussutit pinngoqqaatimut pineqartumut atasumut pinngoqqaatillu qaqutigoortut iluaqutigisinnaanissaannik periarfissatsinnik aallartitsinissamik arsaarinnittoq, Per Berthelsen oqarpoq.