Siumut biilinut akitsuutinut siunnersuummut isumaqataanngitsoq
Siumup Inatsisartuni gruppia biilinut akitsuutit pillugit siunnersuummi, maanna tusarniaaffigineqartumi, Naalakkersuisut eqqarsarluarnissaannik kajumissaaripput.
- Siumumiit tunngaviusumik isumaqarpugut orsussat ikummatissat atorneqarnerisa mingutsitsinerisalu annikillisarneqarnissaat sutigut tamatigut periarfissarsiuttuarneqartariaqartoq.
Siumup Inatsisartuni gruppiata siulittaasua, Hermann Berthelsen, aningaasaqarnermut naalakkersuisup biilinut akitsuutit pillugit tusarniaassusitigisaanut qisuariaatitut tusagassiuutinut nalunaarummi allappoq.
Taanna naalakkersuisoqatigiinnissamnut isumaqatigiissummut innersuussivoq, tassani ilaatigut allaqqavoq: ”Naalakkersuisooqatigiit anguniarpaat sulissutigiuassallugulu nunatta avatangiisittalu mingutsitsinernut suusunulluunniit illersorneqarnissaa”.
Annertuumik allannguuteqarneq isumaqatiginngikkaat
- Taamaattumik Naalakkersuisut kajumissaassavagut biilinik orsussamik aammalu innaallagissamik ingerlasut (hybrid) eqqussinermi akitsuutip allanngortinnissaanut allannguutissatut siunnersuut nalilersorluaqqullugu. Tassami allannguutip ingerlaannaq taamak annertutigisumik allanngornissaa isumaqatiginanngimmat, Hermann Berthelsen allappoq.
- Aammattaaq innaallagiaannarmik ingerlatilinnut akitsuutip annertussusilerneqarnera nalilersorneqaqqittariaqarsorinarluni.
ATV-t qamuteralaallu akitsuuserneqarunnaarnissaat apeqquseraat
Taamaattorli Siumup ATV-it, qamuteralaat biilillu oqitsut akileraarutaasa annikillisinneqarsinnaanissaat isumaqatigaat, taamaaliornikkut akissaatikinnerusut akunnattumillu isertitallit minnerunngitsumillu nunaqarfinni periarfissat pitsaanerulersinnissaat aqqutissiuunniarneqassasoq isumaqaramik.
Kisianni aamma partiip ATV-t qamuteralaallu akitsuusersorneqarunnaarnissaat apeqquserpaa.
- Nunatta minguitsuutinnissaa eqqiluitsuutinnissaa kusanartuunissaalu Siumumiit pingaartitatta ilagilluinnarpaat. Taamaattumillu ATV-t qamuteralaallu tikisinneqarneranni akitsuutip tamakkiisumik peerneqarnissaanut Naalakkersuisut allannguiniarnerat sumik tunngaveqarnersoq paaserusunnarpoq, Hermann Berthelsen tusagassiuutinut nalunaarut naapertorlugu oqarpoq.
- Siumumiik isumaqarpugut kalaallit qimmiannik qimmineqarnerup atajuaannarnissaa illersorneqarnerunissaalu qulakkeerniarlugu, qimussiussisarnikkut akitsuusersuisarneq, soorlu takorniartitsisarnerni oqilisaaffigineqarnissaa Naalakkersuisut aqqutissiuusseqataasariaqartut, Siumumi gruppimi siulittaasoq oqarpoq.
Amerlanerit qamutinik pissarsinissamut periarfissaqalissapput
ATV-t aamma qamuteralaat akitsuusersorneqarunnaarpata innuttaasut amerlanerit taakkuninnga pissarsinissaminnut annerusumik periarfissaqalernissaat, Hermann Berthelsen qularutiginngilaa.
- Qularutissaanngilaq innuttaasut amerlanerusut ATV-nik qamuteralattaarnissaminnullu periarfissaqalissasut, tamassumali kingunerissanngilaa kalaallit qimmeqarnitta kingulliutinneqaleriartornissaa, taanna allappoq.
- Taamaattumik qimusserluni takornariartitsineq annertusarniarlugu oqilisaassiviginiarlugulu, piumasaraarput Naalakkersuisut suliniutit qimmiutillit kattuffiallu qanimut suleqartigalugit piaartumik oqaloqatiginninnissaat aallartinneqassasoq.