qinersineq
Siumup qineqqusaartitaa: Suliffissaaleqinerup ipisilerpaatigut
- Nunarput suliffissaaleqinermit ipisinneqalerpoq, taamaammat suliffissaqartitsiniarneq qiviartariaqalerparput aaqqissuuteqqillugu, taama Siumup Inatsisartunut qineqqusaartitaa Margrethe Thårup Andersen isumaqarpoq
Siumummi sinnerlugu Inatsisartunut qinigassanngortittoq Margrethe Thårup Andersen isumaqarpoq maanna sulisartuusut atugarisaat qanoq iliuuseqarfineqanngippata, taava siunissami sulisinnaasut sulerusussuseerutsinneqassasut.
- Qineqqusaarnermi kisimi maanna takussaasut eqqartorneqarput. Kisianni tamakkiisumik isiginninniartariaqarpugut, tamatumalu kingorna oqallisiginnilluta ajornartorsiutip qiterpiaa tikillugu, Margrethe Thårup Andersen allappoq, imalu nangippoq:
- Pisariaqarluinnarpoq inuiaqatigiinni ajornartorsiutitta ataatsimoorluta qiviarnissaannut. Iluaqutaanngilaq sulisitsisut namminneq inissisimaffimminnit ajornartorsiutit taakkortorpatigit, taamatullu aamma sulisartut. Uani ataatsimoorluta peqataaffigisinnaasatsinnik nassaartariaqarpugut.
Suliffissaaleqineq annikillisariaqarpoq
- Piffissanngorpoq sulisartoqarnerup iluani illuatungeriit tamarmik eqqartueqatigiillutik naapitinneqarnissaannut, taamaaliornermikkut aaqqiissutissanut assigiinngitsunut ataatsimoortumik siunnersuuteqarsinnaaqqullugit.
Taamaammat Margrethe Thårup Andersenip siunnersuutigaa sulisartoqarneq pillugu isumasioqatigiittoqarnissaa.
- Isumasioqatigiinnermi sulisartut, sulisitsisut, politikerit kattuffiillu peqataassapput. Isumasioqatigiinnermi ajornartorsiutit iterngat tikillugu eqqartorneqassapput aammalu ataatsimoorluni qanoq ingerlaqqittoqarsinnaanersoq eqqartorneqassalluni. Naggataagut aaqqiissutissanut siunnersuuteqartoqassaaq siunissamut qaninnermut ungasinnerusumullu tikkuaasumik.