qinersineq
Siumup qineqqusaartitaa: Meeqqat meeqqatut akilinnik angalallit
Siumut sinnerlugu Inatsisartunut qinigassanngortittoq, Lars Jørgen Kleist, isumaqarpoq inersimasunut bilitsip akigitinneqartarneranut ukiut killiliussat qaffanneqartariaqartut
Meeqqat aqqaneq marlunnik ukioqalereersimasut ullumikkut Air Greenlandimut Arctic Umiaq Linemulluunniit ilaallutik angalaniaraangamik inersimasutut akiliisinneqartarput.
Tamannalu ingasappallaartoq Siumut sinnerlugu Inatsisartunut qinigassanngortittoq, Lars Jørgen Kleist, isumaqarpoq.
- Ilaqutariit akissaatikinnerusullu periarfissinneqarlik! Air Greenlandimi Arctic Umiaq Linemilu inersimasut bilitsiinut ukiut killissaritaasut qaffanneqarlik, Lars Jørgen Kleist oqarpoq. Taanna isumaqarpoq ukiunut killissaritaasut Canadami USA-miluunniit atuuttut malillugit inissinneqartariaqartut.
- Nunani sanilerisatsinni Canadami aamma USA-mi taamaattoqanngilaq. Air Canadamut ilaaniaraanni inersimasut naatsorsuussusisoqalersarpoq 16-leereernermi, uffali American Airlinesimi inersimasutut akiliisoqartartoq 18-leereernermi aatsaat, Lars Jørgen Kleist oqarpoq.
Taamaammat Lars Jørgen Kleist isumaqarpoq Naalakkersuisunngortussat qinersisoqareerpat suliniutigisariaqaraat inersimasunut bilitsimut ukiut killissarititaasut qaffanneqarnissaat, taamaaliornikkut ilaqutariit angalanissaminnut periarfissagissaarnerulissammata.
- Uagummi Kalaallit Nunaanni Danmarkimisut angalanissamut periarfissaqanngilagut - aamma Danmarkimiinngilagut - kisiannili Issittumi avinngarusimasuni najugaqariaaseqarluta, Lars Jørgen Kleist oqarpoq.