Kalaallisuut
Siumup politikkeria Tasiilami kalaallisuuliornermik ilinniarfiliortitserusuppoq
Inatsisartuni ilaasortap Laura Táunâjik (S) Tunumi kalaallisuuliornermik ilinniarfiliornissamik pilersitsisoqarnissaanut neriuuteqarpoq.
2010-mi Sisimiuni Kalaallisuuliornermik Ilinniarfik pilersinneqarpoq.
Naalakkersuisulli Tasiilami aamma pilersitsisariaqaraluarput.
Tasiilaminngaanneersoq Inatsisartuni ilaasortaq Laura Táunâjik (S) taama isumaqarpoq.
Assigiinngissuteqarput
Nunatta Avannaarpiaani aamma Tunumi kalaallisuuliornerup assigiinngissusaa ersersinneqarluarpoq. Tamatumani arnap kalaallisuui aammalu angutip assuutaat pineqarput. Tamakkua aamma Kalaallisuuliornermik Ilinniarfimmi ilikkarneqarsinnaapput – taamatummi paasivara. Tunumiut qassit maannamut Kalaallisuuliornermik Ilinniarfimmi Sisimiuniittumi ilinniarsimappat?, Naalakkersuisunut apeqquteqarpoq.
Tunumi annertuumik atorfissaqartitsisoqarpoq najukkami ilinniartitaanikkut, suliffissaqartitsiniarnikkut aammalu inuussutissarsiutitigut siuarsaaniarnermi periarfissat eqqarsaatigalugit, Laura Táunâjik taama isumaqarpoq.
Tunumi assassornikkut eqqumiitsuliornermi ileqqorpassuaqarpoq atorluarsinnaalluartunik, uggornartumillu najukkami ilinniartitaanikkut suliffissaqartitsinikkullu periarfissalulluni. Tasiilami kalaallisuuliornissamik ilinniarfiliorneq suliatut isigalugu annertugisassaanngikkaluartoq, taamaattoq najukkami naleqartitatigut annertoorujussuarmik siuarsaaqataasinnaavoq assassornikkut ileqqutoqqat siuarsarniarlugit suliniuteqassagutta, minnerunngitsumik ileqqutoqqat taakkua Tunumi kinguaariinni kinaassusiliilluarsimammata, Laura Táunâjik oqarpoq.
Atuaruk: Kalaallisuuliornermik ilinniaqatigiit siulliit