Siumup ataatsimeersuarnera
Siumup nalliuttorsiornerani seqinnarik
Siumup nuna tamakkerlugu ataatsimeersuarneranut aallartitat oqallinnerpassuit pissanganartumillu siulittaasumik qinersinerup kingorna, ullumikkut eqqissisimaarnerulaarsinnaapput.
Siumup nuna tamakkerlugu ataatsimeersuarnera tallimanngornermi naammassineqassaaq, tamanna pingasunngornermiilli Sisimiut timersortarfianni ingerlanneqarpoq.
Ulluni marlunni kingullerni politikkikkut oqallittoqarpoq, anguniagassat aamma malitarisassat allanngornerinik oqallinneq, kiisalu siulittaasumik qinersineq.
Politikkikkut sammisat sisamanngornermi naammassineqarput, kisianni ataatsimeersuarneq ullumikkut tallimanngornermi ingerlaqqissaaq. Ullaaq manna Sisimiut Oqaluffianni naalagiartoqarpoq. Tassanilu Siumumi ilaasortat 50-it missaanniittut peqataapput.
Ullumi kingusinnerusukkut Siumup partiip ukiuni 40-ni nalliuttorsiornera malunnartissavaa, tassani aliikkusersuisoqassaaq, qitittoqassaaq aamma nipilersortoqassalluni.
Uani ataani assit takukkit