qimaasut

Siumup Inuusuttunut Suleqatigiiffiat: Qimaasunik tigusisariaqarpugut

Kalaallit Nunaat qimaasunik tigusisalernissaanik IA-p siunnersuutigisimasaa, inuusuttut Siumumeersut tapersersorpaat

Uagut kalaallit akisussaaffimmik tiguseqataalluta qimaasunik tigusisinnaanngornissarput piffissanngorpoq.

Siumup Inuusuttunut Suleqaatigiiffiata tusagassiuutinut nalunaarutaani 'Kalaallit nunarsuarmioqataasutut qimaasunik tigusisariaqarpugut' qulequtalimmi tamanna oqariartuutigineqarpoq.

Atuaruk: 'Qimaasunik ikiuiniannginnatta inuunngilagut ajortut'

Naalakkersuisoqataasut inuusuttunut immikkoortoqarfiata Naalakkersuisut qimaasunut politikkeqalernissaannik, qimaasunillu tigusisalernissamik oqallinnermik aallartitsinissamik kajumissaarpai.

- Nunatsinni ajornartorsiuteqarpugut kisiannili nunat tamarmik ajornartorsiuteqarput. Inoqatigut atugarliornerusut ikiortariaqarpagut, Siumup Inuusuttunut Suliniaqatigiiffiani siulittaasoq, Steve Olsvig Sandgreen tusagassiuutinut nalunaarummi allappoq.

Atuaruk: 'Qimaasunik ikiuinnginneq kussissuuneruvoq'

Europami Amerikamilu iluareqqusaarluni uumissuisumik nipeqarluni oqariartuuteqartarnermut taanna unnersuussivoq.

- Kalaallit inuppalaartuupput katersuiniartoqaraangat katersillaqqissut, kisianni alloriaqqittariaqarpugut qimaasunillu tigusilluta, Steve Olsvig Sandgreen allappoq.

Atuaruk: Steen Lynge: Qimaasut Kalaallit Nunaannit akissaqarfigineqanngillat

Nunarput qimaasunik tigusinissaa Inuit Ataqatigiit siornatigut siunnersuutiginikuuaa. Tamanna 2015-imi naalakkersuisoqatigiissisimasunit itigartitsissutigineqarpoq.

Nunanut allanut naalakkersuisup Vittus Qujaukitsup (S) inuiaqatigiit sammisaq oqallisiginissaanut periarfissaqarsimannginnerat oqaatigaa.

- Nunatsinni qimarngusut pillugit siammasissumik politikkikkut suli oqallisigineqarnikuunngilaq, taamaattumik qimarngusunut nunasisunullu suli erseqqissumik suliaqarnikuunngilagut, taamanikkut taanna oqarpoq.

FN-ip qimaasunut immikkoortoqarfia UNHCR naapertorlugu qimaasut 21,3 millioniupput. Tamanna tunngavigalugu Naalakkersuisut akisussaaffimmik tigusisariaqartut, Vittus Qujaukitsup parteeqatai inuusuttut isumaqarput.

- Naalakkersuisoqatigiit maannakkut qimaasunik tigusisinnaanissamut eqqartuisariaqalerput, Steve Olsvig Sandgreen tusagassiuutinut nalunaarummi naggasiivoq.

Powered by Labrador CMS