tammaartut
Siumup inuusuttai Siciliamiittut
Politikerit inuusuttut Siumumeersut ulluni makkunani ileqquulersimasutut Nunarput qimallugu nunanit allaneersunik inuusuttunik nunatsinnut soqutiginnilersitsiniarluni angalapput
Siumup Inuusuttunut Suleqatigiiffiata (SIS) Nunanik Allanik Suleqateqarnermut Ataatsimiitsitaliaa (NASA) ulluni makkunani Europami inuusuttunut socialdemokraatinik tunuliaqutaqartunut aasaanerani tammaarsimaarnermut peqataavoq.
- Pingaarnertut peqataanermut siunertaavoq Nunatta politikkikkut nunanit allanit ilisimaneqarnerulernissaa, Malik Knudsen, SIS-imi siulittaasup tullia aamma SIS NASA-mi siulittaasoq oqaluttuarpoq.
Siunissami politikerissat
Aasarsioqatigiinneq qeqertami Siciliami illoqarfimmi Terrasinimi pissaaq, ulluni 19.07 – 24.07. Tassani naatsorsuutigineqarpoq inuusuttut 1.200 missaaniittut Europami tamaneersut peqataanissaat.
- Inuusuit ataatsimoortut akornannut pilluni politikkikkut oqallinneq nuannersumik ingerlanneqartarmat, inuusuttut ilaatigut qinikkatut sulilereersut ilaatigullu politikkip silarsuaani siunissaqarluartutut taakkartorneqartartut naapitassaasarput, Malik Knudsen oqaluttuarpoq.
SIS-imi peqataasut tallimaapput, Malik Knudsen, Aki-Matilda Høegh Dam, Suinni Fleischer Johansen, Ineqi Kielsen aammalu Taatsi Olsen.
Nunanut allanut angalanerit tallimat
SIS NASA 2014-imili pilersinneqarami tallimassaa qaammarsaalluni aammalu isumassarsianik katersilluni angalavoq. Taakkunanilu nunarsuaq tamakkerlugu attaveqaateqalersimalluni, Malik Knudsen ilisimatitsivoq.