Politikki
Siumup-immikkoortortaqarfiata Kim Kielsenimut isornartorsiuisoq
Siumup siulittaasua Kim Kielseni namminiilivinnissamut nangaanera ilumoorsinnaanngilaq, immikkoortortaqarfik ilaatigut oqarpoq.
Sisimiuni Siumut ataatsimeersuaqqammerpoq.
Tassa GUX-mi ilinniartoq Kaaleeraq Møller Anderseni immikkoortortaqarfimmi siulittaasunngorpoq.
Aqutsineq iluarineqanngitsoq
Siulersuisunngortut partiip siulittaasua Kim Kielseni isornartorsiorpaat.
- Sisimiuni Siumup ilaasortaasa ullumikkut Nunatta aqunneqarnera iluarinngilaat. Siumup politikkianut naapertuulluartumik siulittaasoqarusuppugut, partiilu avissaartuuffiusoq ataatsimoorfiuleqqinnissamik aaqqiisinnaasumik siulittaasoqarusuppugut, Kaaleeraq Møller Anderseni tusagassiuutinut nalunaarummi ilaatigut taama allappoq.
Taanna erseqqissaassuteqarpoq, partiip iluani avissaartuutsitinerit unitsinneqassasut.
- Piffissanngorpoq Siumumi ataatsimooqqilernissarput, innuttaasulli piumasaannik tusaanerulernissaq. Nammineerneq Siumup politikkerivaa, taamaammat Siumup siulittaasua Naalakkersuisunilu siulittaasoq (Kim Kielsen aaqq.) namminiilivinnissamut nangaanera ilumoorsinnaanngilaq, siulittaasunngorlaaq, Kaaleeraq Møller Andersen oqarpoq.
Siulersuisunngortut ima isikkoqarput:
- Siulittaasoq: Kaaleeraq Møller Andersen
Siulersuisuni ilaasortat:
- Dorthea Isaksen
- Hans Frederik Olsen
- Frederik Olsen
Sinniisussat:
- Ole Kreutzmann
- Markus E. Olsen