Siumup immikkoortortaqarfia: Ilulissani talittarfeqarneq aaqqiivigineqarli
Siumut Ilulissat Avannaata Kommuuniani illoqarfiit pingaarnersaani talittarfeqarneq Naalakkersuinermut suliaqartunut piaartumik aaqqiissuteqartoqarnissaanik piumasaqarpoq
- Ilulissani aalisartoqarfissuusup talittarfitsigut tattoqiffiulluinnarpoq, qujanartumik kommunimiit siunissaq qaninnerusoq isigalugu aasaanerani aaqqiisoqalerpoq. Ungasinnerusorli isigalugu Namminersorlutik Oqartussaniit aaqqiisoqartariaqartoq Siumut Ilulissaniit isumaqarpugut.
Siumup Ilulissani immikkoortortaqarfiata siulittaasua Jørgen Kristensen tusagassiutinut nalunaarummi allappoq.
Kinguneqarsinnaavoq
Iluarsiivigineqanngippat annertuumik kingunerluuteqarsinnaasoq oqarpoq.
- Ukiuni tulliuttuni Ilulissani sanaartugassarpassuit imaaginnavipput, sanaartukkanullu atugassat tamarmik pinngitsoqaratik talittarfik aqqusaartussaavaat. Inuit takornarissallu amerliartorput, angallatit amerliartorlutillu alliartorput, taamatullu assartukkat annertusiartorlutik. Tamakku tamaasa allallu taaneqanngitsut eqqarsaatingalugit talittarfeqarnikkut unammilligassaq imaannaanngitsoq qangali atuuppoq, sulilu annertusiartorluni, Jørgen Kristensen nassuiaavoq.
Talittarfeqarneq ullumikkut taamatut isikkoqartillugu, siunissamilu talittarfimmik atuinissamik qanoq annertutigisumik pisariaqartitsineq piaarnerpaamik nalilersorneqartariaqartoq isumaqarpoq.
‘Ajornerpaat ilaat’
- Talittarfeqarneqarnermut oqartussaaffik pilersaarutillu Naalakkersuisut susassaqarfingaat taamaattoq pilersaarutaat misissoraanni siunissaq eqqarsaatingalugu ukiut tallimat qaangerlugit talittarfeqanermut pilersaarummik suli soqanngilaq. Tamaattumik aarlerinissamut annertuumik pissutissaqarpugut.
- Nunatta avammut tunisassiornerani Avannaata kommunia annertoorujussuarmik pilersuivoq, allaammi aalisarnermiit avammut nunatsinniit tunisat 60-70 procentii Avannaata kommunianinngaanneerlutik. Taamaattorli umiarsualiveqarnerput ajornerpaanut ilaalluni. Tamannalu tikkuussivoq talittarfipput pisariaqartitanut sulinermut ineriartornermullu pingaaruteqartunut ilaalluinnartoq, aningaasalersuinissaq pisariaqartuusoq siunissamullu aningaasaliilluarnerusoq, Jørgen Kristensen oqarpoq.