Siumup iluani avissaartuunneq sukanganerulersoq

Qaasuitsoq Kujallermi Siumup iluani akerleriinnerit suli ingerlapput - sakkortusillutillu.

Enok Sandgreenip gruppiata maanna tukattumik inissitsiternerup ingerlaneranik nassuiaatini nassiuppaa.

Tassani gruppimiipput Nikolaj Jeremiassen, Jakob Ludvigsen, Enok Sandgreen aamma Leo Rosing, partiimilu isumaqatiginninniartussaatitatut imminnut nalilerput. Tamanna tunuliaqutigalugu partiip siulersuisuunerisa IA-p Siumullu akornanni isumaqatigiissut akuerimmassuk malittarisassanik unioqqutitsinerarpaat.

Atuaruk: Enok Sandgreen: Qaasuitsoq Kujallermi borgmesterinngorpunga

- Naggataatigut aamma oqaatigissavarput, Siumut ataatsimut siulersuisut malittarisassaanik unioqqutitsilluni isumaqatiginninniarnerit pisimasut, taannalu siulersuisuunernit iliuuseqarfigineqarani qisuariarfigineqassanngippat, malitarisassanik unioqqutitsineq akuersaarinninnertut ilungersunartumik imaannaanngittumik isigisariaqartoq, taakku sisamat taama inerniliipput.

- Uagut isumaqatiginninniartuuvugut
Enok Sandgreen Naja Petersenimit Atassummeersumit attavigineqarsimasoq, kingorna kaffisoqatigalugu ataatsimeeqatigineqarsimasoq taakku nassuiaapput. Partiimut ilaasortat kommunimut qinigaasut tamarmik oqarasuaatikkut ataatsimeeqatiginerani ataatsimiinneq pillugu naapinnertik pillugu nassuiaavoq.

Atuaruk: Qaasuitsoq Kujallermi Siumukkormiut avissaartuupput

- Siumumi gruppi aalajangerpoq, tipisiuinerusumik Atassut naapinneqassasoq. Soorlu sunik piumasaqarsinnaanera kissaateqarsinnaanera pillugu, tipisiuinermilu uku Aasianniittut Enok Sandgreen aamma Leo Rosing allamik qinikkamik Aasiannukapallassinnaasumik pingatserneqassasut, isumaqatiginninniartoqalerpallu, Jakob Ludvigsen peqataatinneqassasoq, paasissutissiinermi allaqqavoq.

Aasiannukapallassinnaasumik ujartuisoqarmat, pisussaaruppoq qinikkat piffissaqannginnerarlutik, Nikolaj Jeremiassen imminut neqeroorutingivoq.

Atuaruk: Avannaani isumaqatigiinnginneq - Ane Hansen borgmesterinnguinnassaaq

Atassut toqqagassiisoq
Isumaqatiginninniartut IA aamma Atassut ataatsimeeqatigaat, kisianni Atassummik isumaqatiginninniarnerit ingerlateqqinniarlugit aalajangiunneqarpoq.

Atuaruk: Kim Kielsen Siumumi avissaartuuttoqarnerani eqqissisaasoq

Gruppi taanna tallimanngorpat ilungersuummerpoq, Atassut sukkasuumik isumaqatigiissuteqarnissaminnik piumasaqarmata, taamaanngippat IA isumaqatiginiassagamikku.

Tassanilu Siumup gruppia avissaarpoq. Atassummik isumaqatigiissusiornissamut tallimat toqqaapput, taamaalilluni Enok Sandgreen borgmesterinngortussanngorluni.

Atuaruk: Otto Jeremiassenip borgmesterip sinniisuatut toqqarneqarnera isumaqatigiissutaasoq

Taanna isumaqatigiissut Siumup Kattuffianut aamma Siumumi gruppimut nassiunneqarpoq, kisianni akineqanngilaq. Illuanik nalunaaruteqartoqarpoq, Siumut aamma IA arfininngornermi isumaqatigiissuteqarsimasut.

Tamanna tunuliaqutigalugu paasissutissiisut sisamat siulersuisuunerit malittarisanik unioqqutitsinerarneqarput.

Taakku sisamat pisoq pillugu qanoq kinguneqartitsiniarnersut allaqqanngilaq.