Kalaallit Nunaannut ataatsimiititaliaq
Siumup IA qaangerpaa
Saamerliit inassutigaat Aleqa Hammond Kalaallit Nunaannut Ataatsimiititaliami siulittaasumut tullinngussasoq
Partiit illua'tungiliuttut iligiillutik qineqqusaartut kattuffiata Folketingimi ataatsimiititaliani ataatsimut inissat agguataarnerat ullumi akuersissutigaa.
Tamatumunnga atatillugu ataatsimiititaliami amerlanerussuteqartut inerniliipput piffissami tassani siulittaasup tulliatut inissaq Siumumeersumut qinigaaqqammersumut Aleqa Hammondimut tunniunneqassasoq. Taamatut Siumut tusagassiortfinnut nalunaarutikkut paasissutissiivoq.
Taamaasilluni Siumut ataatsimiititaliami IA-mit nukittunerusumik inissisimalerpoq. Siulittaasuuffik nalinginnaasumik Kalaallit Nunaanni partiimut, qinersinermi taagorneqarnerpaasimasumut tunniunneqartaraluarpoq, tassa matumani IA-mut tunniunneqartussaagaluarluni. Talerperliilli Kalaallit Nunaannut Ataatsimiititaliami siulittaasunngortitsiniarput. Maannalu ataatsimiititaliami amerlanerussuteqeartut tassa inassutigaat Aleqa Hammond siulittaasup tullinngussasoq.
Suli ilisimaneqanngilaq partiit naalakkersuisut tunuliaqutaasa, talerperlernik taaneqartartut, kina ataatsimiititaliami siuttaasunngortinniarneraat, immikkut illuinnartumik siulittaasuuffik taanna tigoreerlugu.
Tamatuma saniatigut Aleqa Hammond Forsvarsudvalgimi, Retsudvalgimi, Udenrigsudvalgimi Nordisk Rådimilu ilaasortanngorpoq, taamatuttaarlu - ilaasortat atlantikup avannaaneersut allat assigalugit - Det Udenrigspolitisk Nævn-imi siniisussatut inissinneqarpoq.
Kiisalu Socialdemokraterne qulakkeersimavaat Aleqa Hammond folketingip ataatsimiititaliaani tamani taartaasarsinnaasoq, ataatsimiititaliani kalaallinut soqutigisanik sammisaqartoqassagaangat, Siumumit tusagassiorfinnut nalunaarummi allassimavoq.
– Tamassuma maanna inissinnera nuannaarutigeqaara, Aleqa Hammond oqarpoq.
– Kalaallit Nunaannut ataatsimiititaliami siuttuuffiit inissititernerat siusinnerusukkut pisarsimavoq apeqqutaatillugu kikkut naalakkersuisuunersut aammalu Kalaallit Nunaanni partii anginerpaaq apeqqutaatillugu, tamannalu peqatigalugu siulittaasuuffik sapinngisamik ilaasortanut Kalaallit Nunaanneersunut nikerartittarlugu. Siulittaasuuffik eqqarsaatigalugu taamaasiortoqarsinnaasimanngilaq, tassa qinersinerup kingorna talerperliit aalajangermata siulittaasuuffik tiguniarlugu. Uagutsinnili iligiinni amerlanerussuteqartut periuseq tamanna malippaat inuttaaffillu Siumumut tunniullugu. Tamanna peqatigalugu erseqqissarusuppara tamanna - aammalu ataatsimiititaliat kissaatigisakka tamaasa ilaasortaaffigilerakkit - tassaasoq Siumup Socialdemokraterne-mik suleqateqarnermini angusaa ersarissoq siulleq, Aleqa Hammond oqarpoq.
– Taamaasillunga aamma qularutiginngilara suleqatigiinneq aqqutigalugu Det Udenrigspolitisk Nævn-imut kissaateqartarnera malillugu ilaatinneqarsinnaasassallunga. Folketingimi iluamik sunniuteqarusukkaanni silatusaarneruvoq qallunaat partiiannik, politikkimik kissaatigisamik tapersersuisinnaasumik suleqateqarneq, maani kisimiilluinnarluni inissisimaannarani, Aleqa Hammond tusagassiorfinnut nalunaarut malillugu oqarpoq.