valgteknisk samarbejde
Siumup Demokraatit suleqatigiunnaarpaat
Inatsisartut immikkut ataatsimiinnginneranni Siumup Demokraatit taaseqatigiittarnissamik isumaqatigiissutaat atorunnaarsippaat
Demokraatit siulittaasuata Jens B. Frederiksenip eqqarsaatigisassai amerliallapput. True Arctic Gems Greenlandimi Executive Vice Presidentitut atorfinitsinneqarnera sapaatip akunnerani kingullermi pisumi isornartorsiorneqangaatsiarpoq.
Siumut Partii Inuit ataasinngornerup ullaavani nalunaarfigaat Demokraatinut taaseqatigiittarnissamik isumaqatigiissutigineqartoq atorunnaarsinneqartoq.
Partii Inuit siulittaasuat Nikku Olsen Sermitsiaq.AG-mit nalunaarpoq.
Partii Inuit Siumumit aperineqarput taaseqatigiittarnissamik Siumullu isumaqatigiittoqassanersoq.
Nikku Olsenip nalunaarutigaa Inuit Ataqatigiit aamma assinganik aperineqartut.
Partii Inuit nuannaarput
-Nuannaarutigaarput Siumup Demokraatit suleqatigiunnaarmassuk. Demokraatit ataasiinnarmik anguniagaqarlutik taaseqatigiinnissamik isumaqatigiissusiornikuupput, tassa ataatsimiisitaliani amerlanerusuni peqataatitaqarusunnikuugamik, Nikku Olsen Sermitsiaq.AG-mut oqarpoq.
Partii Inuilli suli taaseqatigiinnissamik Siumut isumaqatigiissummik atsioqataaffigissanerlugu aalajangiukkumanngilaat.
- Partiit anginerit suut neqeroorutigisinnaaneraat takoqqaarusuppagut. Partii Inuinni aamma tallimanngorpamiit ataatsimeersuartussaavugut. Taamaammat upernaami Inatsisartut ataatsimiinnissaannut aalajangernissarput pitsaanerutipparput, Nikku Olsen oqarpoq.
Ukioq nutaanngoqqammersoq Partii Inuit Siumullu taaseqatigiinnissamik isumaqatigiissutaat unitsippaat.
Demokraatit Inuusuttaannit akerlerineqarpoq Demokraatit Siumut taaseqatigiinnissamik isumaqatigiissuteqarfigimmassuk ukioq kingulleq novembarimi. Taama isumaqatigiittoqarnerani Demokraatit ataatsimiisitaliani pingasuni ilaasortaaffeqalerput.
Sermitsiaq.AG Jens B. Frederiksen oqaaseqartinniarlugu sulissuteqarpoq.