Siumup borgmesteriutitaat Nuuluartut?

Kommunep Kujalliup, Qaasuitsup Kommuniata aamma Qeqqata Kommuniata borgmesteriisa kissaatertik annertoqisoq saqqummiuppaat, pisortani atorfiit 600-t Nuummiit illoqarfinnut minnerusunut nuutsikkumallugit.

Kommuneqarfik Sermersuumi kommunalbestyrelsimi ilaasortaq, Mille Søvndahl Pedersen (IA), tupaallannanngitsumik siunnersuummut isumaqataanngilaq.

Taassuma ullumi oqaatigaa, siunnersuut allatut tunngaveqartoq.

- Tassanilu naligiinnerulersitsinissaq aallaaviugunarpoq, taamaattorli Kalaallit Nunaanni illoqarfiit pingaarnersaannut aamma kamassimaarneq ajoraluartumik malunnarluni, taanna tusagassiuutinut nalunaarummi allappoq.

Atuaruk: Siunnersuut: Nuummi suliffiit 600-t ukununnga nuussapput

Ilaqutariit toqqissisimanngitsut
Borgmesterit pingasut kissaataat pineqaannaraluartoq, tassa aalajangiinertaqanngikkaluartoq, ilaqutariippassuit patsisissalimmik ernumalerlutillu toqqissisimajunnaarput.

- Toqqissisimajunnaarnerup ilaqutariit allatuulli nunatsinniit nuunnissamik eqqarsalersissinnaavaat. Tassami – taamaasillutik Nuummiit nuussapput, tamannalu borgmesterit pingasut taakkua tassa nuannaarutigiinnassanerpaat?, IA-mi politikeri aperivoq.

Atuaruk: Nuussinissamik siunnersuut Naalakkersuisut itigartippaat

Naalakkersuisut akisussaaffiat
Borgmesterit pingasut kissaataanni Naalakkersuisut kisimik saaffigineqartut, Mille Søvndahl Pedersen isumaqarpoq

- Suliffiit 600-t Nuummiit illoqarfinnut allanut nussornissaanni qitiusumik allattoqarfik pisortallu ingerlatsivii akiliisuussaapput. Kommunillu suliassaat akisussaaffissaallu ataatsimilluunniit taaneqaratik. Aammalu nussuinerup inuiaqatigiinniit akilerneqartussap qanoq akeqarsinnaaneranut mianersortunnguamilluunniit missingersuusiortoqarsimanani.

- Allaat atorfinitsitsiniarnissanut, sumiiffikkaartumik sulisussatut piukkunnartunik ujartuinissamut ataatsimullu isigalugu suliassap qanoq naleqarnissaanik eqqarsaatersortoqarsimanani. Tassaaginnarpoq sumiiffinnik illersuineq takussutissiatigut kisitsisitigullu toqqorterneqarsimasoq, Inuit Ataqatigiinneersoq Mille Søvndahl Pedersen oqarpoq.

Atuaruk: Partii Naleqqap immikkoortoqarfia: Nuussinissamut akissaqarumallusi sipaaruteqaritsi

Avissaartuutsitsisoq
Borgmesterit pingasut nuussinissamut siunnersuutiminnut kisitsisilersuisimannginnerat aamma kingunerisinnaasaanik allassimannginnerat, taassuma paasisinnaanngilaa.

- Naalakkersuisut iliuuseqarnissaat taamaallaat kissaatigineqarpoq. Nuullu upissunneqarluni. Taakkua arlaannaataluunniit Kalaallit Nunaat nukittunerulersinnavianngilaa, pitsaanerulersinnavianngilaa imaluunniit pisuujunerulersinnavianngilaa.

-Akerlianik oqallinneq ikkannerulerpoq appartinneqarluinnaqqillunilu aammalu illoqarfiit akornanni akaareqatigiinnginnermik pilersitsilluni, tamannami innuttaasunut iluaqutaasussanik politikkikkut iliuusissanik taasassaqannginneq toqqortorniarlugulusooq politikerit ilaannit sakkortusarniarneqartarpoq, Mille Søvndahl Pedersen allappoq.

Aamma atuakkit:

Suliffiit sinerissamut nuutsinneqartariaqarpat - Qanoq isumaqarpit?

Atassutip nuutsitsinissamut siunnersuut isornartorsiorpaa

Aningaaseriviup pisortaata nuussinerup akissaa ujartorpaa

Sulisitsisut: Nuussuinermik pilersaarutit inuit 1.500-t sunnissavaat